Rutte ta bisa cu no lo disculpa pa sclavitud

Gobierno Hulandes no tin plan na e momento aki pa ofrece un disculpa pa sclavitud y e rol di Hulanda den trafico di esclavo, segun prome minister Hulandes, Mark Rutte a bisa durante un debate riba racismo y discriminacion e siman aki.

Dos di e cuatro partido di coalicion –centro-democrata D66 y Union Cristian – a pidi gobierno pa tuma un postura, pero Rutte a bisa cu un disculpa oficial por aumenta polarisacion.

“Mi ta compronde e peticion y mi sa kico un disculpa por nifica”, Rutte a bisa miembronan di parlamento Hulandes. “E pregunta ta, bo por tene hende cu ta biba awendia responsabel pa pasado? Algun por experiencia esaki como doloroso. E debate definitivamente no a termina.”

E gabinete a set up un comite special pa evalua sclavitud y su impacto riba presenta, y un disculpa sigur lo bin den discusion, segun Rutte. Mas importante, no tin mayoria parlamentario pa un disculpa, NOS a destaca.

E debate, yama pa D66, PvdA y GroenLinks a yega apenas algun siman despues cu Rutte y lider di fraccion di partido conservador VVD, Klaas Dijkhoff a admiti cu tin un problema cu racismo na Hulanda. E partidonan tabata kier discuti introduccion di medidanan estricto contra agencianan cu ta dispuesto pa discrimina, prohibi profilacion etnico manera practica pa polis y oficina di impuesto, y tambe debati riba un disculpa pa e rol di Hulanda den trafico di esclavo.

Sinembargo, Volkskrant den su reporte di e discusion a bisa cu e idea por tabata noble, pero den practica e debate tabata mas manera un pelea entre bisiña. E prome contribucion, di lider di PvdA, Lodewijk Asscher, ‘a degenera den un pleito habriendo herida bieu y predicando na e convertidonan’. Lider di GroenLinks, Jesse Klaver a yama lider di PVV, Geert Wilders, un ‘idiota’ y Wilders a yama Klaver ‘un hooligan politico’ cu miembronan di partido cu a vota pa ‘asesinonan masal comunista’.

A pesar di e mal ambiente, Rutte a bay di acuerdo pa evalua e opcion di declara aña 2023 como ‘aña pa recorda sclavitud’. E aña ey lo ta 150 aña desde cu finalmente a aboli sclavitud den colonianan Hulandes. GroenLinks y D66 a bin cu e propuesta, y Rutte a bisa ‘ta un bon idea’.