Riba dia 14 di december ultimo, e publico presente na Cas di Cultura a gosa di e di tres one woman show “Alegria di Ruthy # 3″ na unda e suma di placa recauda di benta di carchi a wordo duna na un fundacion cu semper tin mester di ayudo, tanto financiero como di boluntario.

Den un conferencia di prensa di ayera den oranan di mainta, Ruthy Vrieswijk-Bergen, miho conoci como “Lady Ruth” a haci entrega di un donacion na Animal Shelter. El a splica cu hopi alegria cu nan a scoge e fecha di diamars 10 di Januari 2023, un diamars trankil pa haci entrega di e suma recauda na benta di carchi di e show “Alegria di Ruthy # 3″ na e ekipo dinamico di Wayaca Animal Shelter, specificamente na Sra. Sandy Willemson y Ria Blijden.

“Nos por wak back riba un dushi y exitoso show atrobe. Mas o menos 200 persona a bini y presencia e show, di cual den e cantidad aki tin carchinan cu nos a regala, pa cuadra cu e dushi y bunita Spirito di Pasco y fin di aña,” Ruthy a bisa.

E suma cu ta ser entrega na Aruba Animal Shelter ta 1.418 florin “e cual ta algo cu a wordo haci cu hopi amor y door cu ora a ofrece publico na varios actividad pa coopera y cumpra carchinan nan tabatin otro actividad caba, entre otro cena di Pasco, cu famia, amigonan y coleganan, nos a haci nos best y di “no a give up”.

Igualmente a conta cu esaki ta prome biaha cu Ruthy a tene su show den e luna di december, den cual nan a haya diferente experiencianan bunita, specialmente e anochinan di training cu su tremendo ekipo di artista y musiconan den ‘Veranda Shon Johan’.

Ruthy a sigura tambe cu e ta gradici y a keda hopi satisfecho con tur cos a cana, prome, durante y despues di su show. Semper tin espacio pa mehora, pero mirando cu Lady Ruth no ta un profesional, pero si un artista multifacetico natural cu curason y talento, el a duna di su mes atrobe y a sinti e amor den su publico resalta den nan dushi harimento y dushi aplauso.

Ya cu banconan no ta traha cu cheque mas, nan a haci entrega di e suma na cash.

Ruthy a dicidi di haci e donacion aki ya cu den un di su shownan un amiga di dje a haci un joke di pushi cu Ruthy a relaciona cu Animal Shelter y esey a keda den su mente y curason, pa e motibo ey e show number 3 su donacion tabata dirigi pa e fundacion aki, anteriormente el a haci donacion tambe pa Fundacion pa Hende Muhe den Dificultad cu awor ta yama Fundacion Contra Violencia Relacional y na tres grupo di Scouting Aruba.

Pa finalisa, el a duna un mensahe y un danki na su sponsornan y na tur cu a cumpra un carchi y a bay presencia e show y baha un crenchi di stress cu e harimentonan y gosa di e bunita cantamento, bailamento y recitacion di poemanan den 4 idioma.

Aruba animal Shelter

Manera ta conoci, e prome ley di cacho cu ainda ta wordo usa a wordo implementa dia 1 di february di 1955 y a wordo redacta pa enfrenta e problemanan di cachonan riba caya cu ta un di e problemanan cu Aruba ta sigui enfrenta for di basta tempo caba.

Cu apoyo di Vrijmetselaars Asociacion di Prevencion di Crueldad pa bestianan di Aruba (Association for the Prevention of Cruelty to Animals) a cuminsa na 1950 y tabata ubica den un antiguo bunker cerca aeropuerto.

Pa purba di mantene e refugio di bestianan, Aruba Animal Shelter a wordo funda na 1952, pero den menos di dies aña el a stop di existi debi na escasez di fondonan y salida di boluntarionan, un historia a continua hasta 1986 na unda den un notario a wordo registra e fundacion Aruba Animal Shelter Foundation hunto cu boluntarionan y un servicio veterinario cu te awe ta ofrece ayudo na e cachonan y pushinan cu no tin un hogar pa biba y cu ta core peliger riba caya.

Pa Sandy y Ria di Aruba Animal Shelter e problema di cachonan y pushinan riba caya ta keda persisti, tin algun doñonan cu ta sterilisa nan y pone chip pero nan ta bay bek na caya, pa loke ta trata adopcion, a conta cu aña pasa tabata poco loke nan a registra, nan ta espera cu e aña aki por tin mas cantidad di hende cu kier adopta un mascota, mas donacion y mas boluntarionan pa nan por continua cu e nobel causa aki.