Ruta comercial entre Aruba y Republica Dominicana mester keda sostenibel

Gobierno di Aruba kier fortalece su relacion comercial cu Republica Dominicana. Di forma bilateral nan ta bin haciendo esfuerso pa logra fomenta nan relacion comercial di forma mas structural.

Den cuadro di conmemoracion di e 176 aniversario di independencia di Republica Dominicana, Prome Minister, Evelyn Wever-Croes a declara na Bon Dia Aruba cu nan ta bayendo riba un bon caminda pa logra e meta aki.

Aruba ta buscando alternativa for di nos region mes pa abastece nos poblacion cu productonan alimenticio di bon calidad y bon prijs, despues cu a surgi e crisis cu e pais bisiña di Venezuela. Den varios ocasion e gobierno di Venezuela a cera su frontera y blokia e salida tradicional di nan productonan, principalmente fruta y berdura pa nos isla. P’esey ta hopi importante pa Aruba tin bon lasonan y estrecha esaki mas cu Republica Dominicana y otro paisnan di nos region.

Premier Wever-Croes a bisa cu den e proceso di fortalece e relacion comercial Aruba-Dominicana, mester tene cuenta cu e escala chikito di nos economia. El a destaca cu Republica Dominicana ta hopi instrumental riba e tereno aki. El a anuncia cu ya caba tin un barco cu ta bin nos isla carga cu fruta y berdura.

E ta mira cu e presencia di e barco aki ta un echo. Pero siman pasa el a sostene un reunion cu e Consul Dominicano na Aruba, Sr. Victor Marcelino Comprés Rosario, pa percura na nivel di gobierno pa pone mas enfasis pa e ruta maritimo bira mas regular y asina nos paisnan por haci mas uzo di dje, y manten’e. Ya cu nos por tin comerciantenan cu ta bin cu e idea pa habri e ruta, pero si nos no ta sostene nan, e ruta no ta keda sostenibel, el a declara na e matutino aki.

“Nos tin como gobierno y como henter comunidad sostene pa e ruta aki keda uno viabel pa nos por haya nos fruta y berduranan na prijs mas rasonabel”, el a bisa.

Den cuadro di independencia di Republica Dominicana, premier Wever-Croes a manda su palabra di felicitacion na henter comunidad Dominicano na Aruba. El a gradici nan ya cu e Dominicanonan a bin nos pais pa yuda nos desaroya nos economia. Tambe e ta un ocasion special pa sigui estrecha e lasonan di familiaridad y cultural entre ambos pais, ya cu Aruba y Republica Dominicana tin tanto den comun cu si nos uni, nos por logra cosnan grandi, manera e mesun Consul Comprés Rosario a yega di señala