Rusia y China a pone un veto riba e propuesta di resolucion cu Estadonan Uni a introduci den Conseho di Seguridad di Nacionnan Uni ayera. E resolucion tabata urgi pa tene eleccion “liber, husto y creible” y a pidi pa e entrada sin traba di ayudo humanitario na Venezuela.
Nuebe di e 15 miembronan di e Conseho a vota na fabor di e texto Mericano. Surafrica, Rusia y China a vota contra, mientras e otro tres miembronan a abstene di vota.
“Nos ta pidi e miembronan di e Conseho pa nan no ta complice di e maniobra polemico aki y nos ta pidi pa vota contra e proyecto di Estadonan Uni y cu mester apoya esun di nos cu realmente kier yuda pueblo di Venezuela,” e embahador Ruso na ONU, Vasili Nebenzia, prome cu e votacion y di su parti a presenta otro propuesta di resolucion.
E iniciativa di Merca a pidi inicio di “un proceso politico pacifico” na Venezuela cu por conduci na eleccion presidencial liber, husto y creible, considerando cu esun di aña pasa mei, unda Maduro a sali elegi, no tabata esey.
E texto tabata solicita e secretario general di ONU, Antonio Guterres, pa sigura e proceso electoral ey y a haci un yamado pa evita un deterioro mayor di e situacion humanitario, permitiendo un suministro di asistencia sin traba p tur esnan cu mester di esey.
“Lamentablemente, votando contra e resolucion aki algun miembro di e Conseho aki ta continua protegiendo Maduro y su complicenan y prolongando sufrimento di e Venezolanonan”, e enviado Mericano Venezuela, Elliott Abrams. A lamenta.
E iniciativa Ruso tampoco a logra aprobacion, y e keda rechasa cu 4 voto so na fabor, 7 contra y 4 abstencion.
