Oficialnan Ruso a invita un Frances explorado di ocean pa duna conseho tocante con por libera di forma sigur casi 100 bayena captura ilegalmente, expresando speransa cu e animalnan por wordo libera durante berano.
Jean-Michel Cousteau di Ocean Futures Society a yega e ‘Far East’ di rusia ayera den un mision pa inspecciona e animalnan y yuda crea e condicionnan pa nan wordo libera. Cousteau, yiu homber di e famoso oceanografo Jacques Costeau, a expresa preocupacion tocante e condicion di e animalnan y a ofrece ayudo na gobierno Ruso.
E condicion di e bayenanan a lanta preocupacion internacional, y presidente Vladimir Putin a ordena autoridadnan investiga e caso y libera e bestianan. Fiscalnan Ruso a acusa cuater compania cu tin e bayena cu cargonan criminal.
Bayena tin un balor enorme riba mercado preto, y activistanan ambientalista local a sospecha cu nan a wordo captura pa benta na parkenan di diversion na China. Ley Ruso ta permiti captura di bayena unicamente pa proposito ‘cientifico’.
Gobernador regional Oleg Kozhemyako a reuni cu Cousteau na Vladivostok, expresando speransa cu e experiencia aki lo yuda ‘tin un bista completo con pa permiti e animalnan adapta bek pa biba den naturalesa’.
Cousteau a reuni cu minister di recurso natural Ruso, Dmitry Kobylkin na Moscu diahuebs. Kobylkin a bisa cu berano ta ofrece e condicionnan mas faborabel pa libera e 97 bayena Beluga y orca.
“Nos no por libera e animalnan den winter, esey lo a mata nan”, Kolbykin a bisa. “Nos por y mester haci e trabou aki e berano binidero.”
Cientificonan Ruso ta calcula cu e esfuerso di rehabilitacion lo costa como $4.6 miyon.
Activistanan a bati alarma na fin di herfst ultimo, ora cu 101 beluga y orca a wordo captura y poni den un facilidad di contencion marino, cual ambientalistanan ta yama un ‘prizon di bayena’, cerca di e puerto di Nakhodka.
Fiscal local a bisa cu varios di e animalnan a huy, pero ambientalistanan a bisa cu cuater di e bestia probablemente a muri pa motibo di mal condicion y temperatura abou.
