(NLTimes)—Dialuna Rusia a demanda na huesnan di e Corte Internacional di Husticia na e Palacio di Paz na Den Haag cu un caso concerni e guera na Ucrania mester ser rechasa. E caso ta envolve e declaracion di Rusia cu e kier a preveni genocidio den e pais bisiña. Ucrania a acusa e pais di mal uso di acuerdonan internacional pa uza esaki como un hustificacion pa un invasion.
Ucrania a acerca e corte mas halto di Nacionnan Uni aña pasa, algun dia despues di e invasion di Rusia. Presidente Ruso Vladimir Putin a declara cu residentenan di Oost-Ucrania tabata enfrentando opresion y genocidio pa e gobernantenan pro-west na Kyiv.
E autoridadnan Ucranianio ta argumenta cu no tin ningun riesgo di genocidio den e parti oost di e pais, unda e ehercito ta bringando contra rebeldenan pro-Rusia desde 2014. Tambe nan a mantene cu e Convencion di Genocidio no ta provee un fondo legal pa un invasion pa para e supuesto genocidio. Rusia ta argumenta en contra, bisando cu Ucranianionan ta purbando di obtene un huicio riba e legalidad di e guera via un “loophole” legal.
Dialuna Rusia a argumenta atrobe cu e caso no ta pertenece na e corte: “Ucrania no ta acusando Rusia di genocidio. Ucrania tambe no ta acusando Rusia di negligencia den e prevencion of empuhe di genocidio. Ucrania ta insisti cu ningun genocidio no a sosode,” segun e lider di e ekipo legal di Moscu, Gennadi Kuzmin, na e Corte Internacional di Husticia. “Si ningun genocidio a tuma luga, e Convencion di Genocidio no por a ser viola.”
Aña pasa, e Corte Internacional di Husticia a apoya Ucrania. Na maart, Rusia a ser ordena pa para e invasion, pero e pais no a cumpli. Moscu a argumenta cu e corte no tin hurisdiccion pa duna huicio riba e asunto. Esaki ta kico e proceso actual ta discutiendo, cual lo continua te cu dia 27 di september.
Ucrania lo tin e oportunidad pa responde diamars.
