Den un operacion di casi shete ora, servicionan di emergencia di Rusia a rescata 536 piscado riba ijs despues cu nan a keda pega riba un pida grandi di ijs cu a kibra separa di e isla di Sakhalin na Siberia oriental, segun oficialnan.
Alrededor di 60 otro hende a logra subi bek na e costa riba nan mes diamars anochi, segun oficialnan di emergencia.
Imagen di video di e incidente ta mustra gruponan di persona uzando piesanan chikito di ijs pa flota y purba di rema pa yega costa di Rusia, mientras e pida grandi di ijs cu e piscadonan trapa riba dje tabata flota lentamente alehando di tera firme.
Segun algun di e piscadonan Ruso, pa ora nan a ser rescata, e awa friu entre e ijs y costa ya tabata 200m di largo.
Esaki ta di tres biaha den un siman cu servicionan di emergencia den region di Sakhalin mester a rescata piscadonan di ijs trapa riba masa glacial flotando. Dia 22 di januari, alrededor di 300 persona a keda trapa riba ijs, y diadomingo otro 600 tambe a keda trapa.
Autoridadnan local a culpa e piscadonan pa ignora advertencia di siguridad y bay pisca rija ijs a pesar di peliger di keda trapa.
