(AP) – Rusia a lansa un nave di rescate diabierna pa dos cosmonauta y un astronauta di NASA, kende nan nave original pa bay cas a haya un lek peligroso mientras tabata para na Stacion Espacial Internacional (ISS).
E capsula Soyuz nobo, bashi, lo yega na e laboratorio den orbita riba diadomingo.
E lek den e capsula na december a keda culpa pa un micro-meteorito cu a kibra un radiador externo, bashando su coolant. Mesun cos a parce di a sucede atrobe anteriormente e luna aki, e biaha aki riba un nave di cargo Ruso cu tabata mara. Bista di camara a mustra un buraco chikito den cada astronave.
Agencia Espacial Ruso a retrasa e lansamento di e Soyuz di reemplaso, buscando pa cualkier defecto di fabrica. No a haya ningun problema, y e agencia a bay door di e lansamento diabierna marduga for di Kazakhstan di e capsula cu cargo di suministro mara na e tres asiento.
Mirando e necesidad urgente pa e capsula aki, dos oficial top di NASA a biaha for di Merca pa observa e lansamento personalmente. Pa alivio di tur, e capsula a alcansa orbita safe nuebe minuut despues di despega – “un trip perfecto den orbita”, segun Rob Navias di Control di Mision di NASA a reporta for di Houston.
Oficialnan a determina anteriormente cu tabata demasiado riesgoso pa trece Frank Rubio di NASA y Sergey Prokopyev y Dmitri Petelin di Rusia back den nan Soyuz daña proximo luna manera tabata plania originalmente. Sin coolante, e temperatura di e cabina lo aumenta durante e biahe back na Tera, potencialmente dañando computer y otro ekipo y exponiendo e tripulacion na calor excesivo.
Mientras e Soyuz ta yega, plannan di emergencia ta pa Rubio move na un capsula di SpaceX cu ta mara na e stacion espacial. Prokopyev y Petelin ta keda asigna na nan Soyuz daña den e caso poco probable cu mester sali rapidamente. Tin un persona menos abordo por tene e temperatura abao na un nivel cu por maneha, segun ingenieronan Ruso a conclui.
E Soyuz daña lo bolbe Tera sin niun persona abordo pa fin di maart pa asina ingenieronan por examin’e.
