(AP) — Un oficial espacial Ruso ayera a culpa un problema di software riba un laboratorio recien acopla pa brevemente a pone e Stacion Espacial Internacional (ISS) sali di su posicion.
E stacion espacial a perde control di su orientacion durante 47 minuut riba diahuebs, na momento cu e laboratorio cientifico Nauka di Rusia accidentalmente a cende su thrusternan algun ora despues di a acopla, pushando e compleho orbitante for di su configuracion normal. E posicion di e stacion ta clave pa ricibi energia di panelnan solar y pa comunicacion cu teamnan di sosten espacial back na Tera. E comunicacion di e stacion espacial cu controladornan na Tera tambe a faya dos biaha pa algun minuut riba diahuebs.
Vladimir Solovyov, director di vuelo di e segmento Ruso di ISS, a culpa e incidente riba un ‘fayo di software a termino corto’. Den un declaracion duna ayera pa agencia espacial Ruso, Roscosmos, Solovyov a bisa cu pa motibo di e fayo, un comando directo pa cende e motornan di e laboratorio a wordo implementa pa eror.
El a agrega cu e incidente ‘rapidamente a wordo contraresta pa e sistema di propulsion’ di otro componente Ruso na e stacion, y cu ‘na e momento, e stacion ta den su orientacion normal’ y tur su sistemanan ‘ta operando normalmente’.
Director di Roscosmos, Dmitry Rogozin despues a sugeri cu un ‘factor humano’ por a hunga un rol. “Tabatin asina un euforia (despues cu Nauka exitsamente e acopla na ISS), hende no a tene cuenta cu e sistema di control di e bloke lo continua ahustando su mes den espacio. Y a determina un momento tres ora despues (di acopla) y a cende e motor.”
NASA a bisa diahuebs cu e incidente a move e stacion 45 grado for di su posicion, como 1/8 di un circulo completo, pero e compleho nunca tabata draai, no tabatin daño inmediato ni peliger na e tripulacion.
E incidente a causa cu NASA a pospone e ripiticion di test di vuelo pa e capsula di tripulacion di Boeing cu tabata programa pa diabierna tardi for di Florida. E lo ta e segundo intento di Boeing pa yega na e stacion na 400 kilometer di haltura prome cu ta pone astronautanan abordo. Problemanan di software a causa fracaso di e prome test.
E laboratorio di 20 ton metrico di Rusia yama Nauka, cu retraso largo, a yega trempan diahuebs, ocho dia despues cu a sali for di facilidad di lansamento Ruso na Baikonur, Kazakhstan.
E lansamento di Nauka, cu lo provee mas espacio pa experimentonan cientifico y espacio pa e tripulacion, a wordo retrasa varios biaha pa motibo di problema tecnico. Inicialmente tabata programa pa yega na 2007.
Na 2013, expertonan a haya contaminacion den su sistema di fuel, resultado den un reempleso caro y largo. Otro sistemanan Nauka tambe a pasa den modernisacion of reparacion.
Cu 13 meter di largura, Nauka a bira e prome compartimento nobo pa e segmento Ruso di ISS desde 2010. Riba dialuna, un di e unidadnan mas bieu di Rusia, e compartimento di caminata espacial Pris, a desacopla for di e stacion pa libera espacio pa e laboratorio nobo. Nauka ta bay rekeri cantidad di maniobra, incluyendo hasta 11 caminata espacial cuminsando na comienso di september, pa prepara pa su operacion.
Segun Solovyov, riba diabierna e tripulacion tabata druk igualando e presion den Nauka y tabatin plan pa habri e porta na e laboratorio mas laat riba e mesun dia.
ISS actualmente ta opera pa astronautanan di NASA, Mark van de Hei, Shane Kimbrough y Megan McArthur; Oleg Novitsky y Pyotr Dubrov di corporacion espacial Roscosmos di Rusia; astronauta di Agencia di Exploracion Aeroespacial Hapons, Akihiko Hoshide; y astronauta di Agencia Espacial Europeo, Thomas Pesquet.
Na 1998, Rusia a lansa e prome compartimento di e stacion, Zarya, cu a sigui na aña 2000 cu otro pida grandi, Zvezda y tres modulo mas chikito den e siguiente añanan. E ultimo di nan, Rassvet, a yega e stacion na 2010.
