(AFP)—Kremlin a descarta ayera pa duna back Ucrania e teritorionan cu el a declara di anexa como parti di un acuerdo di paz den futuro, poniendo un liña cora firme mientras oficialnan Ucraniano y Ruso ta reuni na Istanbul pa un ronda nobo di discusionnan pa normalisa e relacion entre e dos nacion.
Presidente Mericano Donald Trump a pusha pa un fin rapido di e conflicto desde cu el a tuma oficina luna pasa, tumando contact cu presidente Ruso Vladimir Putin den un cambio sorprendente den politica Mericano den exterior.
E discusionnan na Istanbul ta bin despues di un reunion di nivel halto na Saudi Arabia na comienso di luna, y ta diseña na restaura relacion diplomatico despues cu personal di embahada di ambos banda a ser expulsa bao e administracion di Joe Biden.
Putin a bisa ayera cu e contacto cu Merca a duna “algun speransa” pa resolve e conflicto, pero su vocero a cauciona mas trempan cu pa duna back e teritorionan anexa den Ucrania “no tabata discutible.”
“E teritorionan cu a bira suheto di e Federacion Ruso, cual ta inscribi den e constitucion di nos pais, ta un parti inseparable di nos nacion,” vocero di Kremlin Dmitry Peskov a conta reporteronan.
Algun luna despues di lansa un ofensiva masivo den februari 2022, Rusia a declara e anexo di cuatro region pazuid y den e parti oost di Ucrania—Donetsk, Lugansk, Zaporizhzhia y Kherson. El a anexa e peninsula Crimeo for di Ucrania na 2014.
Ucrania y mayoria observador internacional a descarta e anexo como ilegal, cual Ucrania a reitera den nan contesta pa e remarcanan di Kremlin. “Ucrania tin su frontera internacionalmente reconoci,” segun e vocero di ministerio di Asunto Externo Georgiy Tykhy.
“Ta echt ridiculo pa mira nan referi na nan constitucion” pa hustifica e anexo, el a agrega. Forsanan Ruso ta controla gran parti di e region di Donetsk y Lugansk pero solamente un parti di Zaporizhzhia y Kherson. Moscu tambe ta ocupa parti di e region Kharviv den e parti noordoost di Ucrania.
Presidente Ucraniano Volodymyr Zelensky a concede cu su ehercito ta falta recurso pa reclama e teritorionan ey, pero ta bisa cu algun teritorio captura por ser debolbi via diplomacia.
Kyiv a tuma centenares di kilometer cuadra di e region Ruso di Kursk y Zelensky a trece dilanti e posibilidad di un “intercambio” di teritorio cu Moscu—un nocion cu tambe a ser descarta pa Rusia.
Putin a bisa ayera cu e discusionnan entre Merca y Rusia a duna “algun speransa” di resolve “problemanan” manera e conflicto Ucraniano. “Tin un deseo mutuo pa traha riba restaura relacion,” Putin a bisa durante un reunion di e agencia di seguridad FSB.
Peskov a conta reporteronan cu pa restaura e relacion kibra cu Merca tabata un “proceso.”
“Ningun hende ta anticipa cu e decisionnan lo bin facil y rapido. Pero e disposicion politico di e dos pais, cu e disposicion di tende y compronde otro, nos lo por sali exitoso den e proceso aki,” el a bisa.
E comentarionan di Putin ta bin como parti di un serie di actividad diplomatico entre Rusia y Merca, y lidernan Mericano y Europeo, mientras tur banda ta afirma nan posicion na Trump.
