(AP) – Presidente Ruso, Vladimir Putin a indica den un entrevista transmiti ayera cu Rusia a suspende su participacion den e tratado New START no solamente pa motibo di e capacidadnan nuclear di Merca sino tambe esnan di otro paisnan di NATO.
Manera el a haci varios biaha durante e guera na Ucrania, Putin tambe a bisa den comentarionan publica pa agencianan noticiero Ruso cu Rusia ta enfrenta un menasa existencial pasobra miembronan di NATO ta buscando e “derota strategico” di su pais.
Putin a anuncia diamars ultimo cu Moscu tabata suspendiendo su participacion den e tratado di 2010 pa inspeccion nuclear. Den e entrevista cu canal di television Rusia 1 despues di a marca e prome aniversario di e invasion Ruso di Ucrania riba diabierna, el a bisa cu su declaracion ta bin di e necesidad pa “garantisa seguridad, stabilidad strategico” pa Rusia.
“Na momento cu tur paisnan liderando NATO a declara cu nan meta principal ta pa infringi un derota strategico riba nos… con nos por ignora nan capacidadnan nuclear den e condicionnan aki?” Putin a puntra. El a argumenta un aña pasa cu su meta den invadi Ucrania tabata pa reduci menasa pa seguridad di Rusia. Algun biaha durante e conflicto el a menciona e menasanan aki como hustificacion pa potencialmente usa armanan nuclear na Ucrania.
Mientras ayudo militar occidental a yena e pais invadi, e lider Ruso y su minister di Exterior a pinta e guera como un pelea de facto entre Rusia y no solamente Ucrania, sino NATO. Aliadonan di Ucrania a enfatisa cu nan kier evita di bira partidonan luchando directamente den e guera mientras ta ekipa Ucrania pa defende su mes y tuma back teritorio captura pa Rusia.
New START ta e ultimo acuerdo di control di arma entre Moscu y Washington. Suspendiendo participacion di su pais, Putin a bisa cu Rusia no por acepta inspeccionnan di Merca di su facilidadnan nuclear bao di e pacto mientras Washington y su aliadonan di NATO ta busca pa derota Rusia na Ucrania. Putin a enfatisa cu Moscu no ta retirando di e pacto, y Ministerio di Exterior Ruso a bisa cu e pais ta bay respeta e limitenan di e tratado riba arma nuclear y continua notificando Merca tocante lansamentonan test di misil balistico.
Putin a bisa cu occidente kier elimina Rusia. “Nan tin un meta: disolve e ex-Union Sovietico y su parti fundamental – e Federacion Ruso,” Putin a bisa.
Apelando na e nacionalismo di su ciudadanonan, Putin a pronostica cu si occidente logra destrui Rusia y establece control, personanan Ruso etnico no ta bay sobrevivi como un pueblo distinto.
“Ta bay tin Muscovita, Uraliano y otronan,” el a bisa di e posibel fragmentacion di Rusia den gruponan regional. Occidente lo acepta Rusia apenas parcialmente den e asina-yama “famia di pueblonan civilisa,” kibrando e pais den piesanan separa, el a bisa.
