Por lo menos un persona a ser mata y cinco herida den un tiroteo na oficina central di Servicio Secreto Federal (FSB) di Rusia, den centro di Moscu, segun medionan Ruso.
Un homber arma a habri candela na entrada di e entidad cu un arma automatico y a ser mata pa un oficial arma, agencia di noticia Interfax a reporta. Forsanan di seguridad a traha un cordon alrededor di e area y a move mirones for di caya den edificionan ey cerca.
E tiroteo a sucede algun ora despues cu presidente Putin a tene su conferencia di prensa anual. Detayenan di e incidente no a ser divulga. FSB a desmenti reportenan inicial cu tabata bisa cu tabatin tres homber arma den e atake. E reportenan no confirma tabata bisa cu a mata dos homber den e lobby mientras e tercer a core bay den un edificio cerca unda polis a mat’e den un intercambio di candela.
Entre esnan herida tabatin dos oficial seriamente herida, segun ministerio di Salud a conta medionan Ruso. Un rato despues e agencia di inteligencia mes a confirma morto di un oficial di FSB, aunke no a keda cla si e tabata un di esnan reporta anteriormente como herido.
Autoridadnan Ruso a inicia investigacion den e caso aki di intento di asesinato di oficialnan di husticia. Ta investigando si e atake tabatin algun relacion cu e conferencia di prensa di presidente Putin, cu a dura cuatro ora y a caba den atardi. E atake tabata riba bispo di dia di servicionan di seguridad na Rusia, y Putin tabata atendiendo e tema di seguridad den un reunion.
