(AP) — Rusia a bisa ayera cu a captura un pueblo den oriente di Ucrania como parti di su avance intenso pa e ciudad di Bakhmut, mientras aliadonan di Ucrania no a logra resolve un disputa tocante si mester manda tankinan avansa di bataya, cual e pais ta desea.
Vocero di ministerio di Defensa Ruso, Igor Konashenkov a bisa cu e pueblo di Klishchiivka, cual ta ubica nuebe kilometer sur di Bakhmut, a keda “libera”. No por a verifica esaki independientemente, y oficialnan Ucraniano no tabatin comentario inmediato riba esaki.
Tuma Klishchiivka lo por ta apenas un avance menor, pero Kremlin ta hambra pa bon noticia for di campo di bataya despues di lunanan di obstaculo.
Bakhmut, di otro banda, lo ta un premio mas grandi. E por permiti Rusia interumpi liñanan di suministro Ucraniano den oriente y menasa otro ciudadnan teni pa Ucrania den region Donestk.
Sinembargo, oficialnan Mericano a cuminsa pusha e Ucranianonan pa kita nan enfoke for di Bakhmut y enfoca riba preparacion pa un ofensiva den sur, segun un oficial familiar cu punto di bista di administracion di presidente Joe Biden.
E oficial a bisa cu e administracion a expresa cu nan ta kere cu tin alto potencial pa e Rusonan eventualmente pusha forsanan Ucraniano for di Bakhmut memey di algun di e batayanan mas intenso di e guera te awo. E oficialnan ta kere cu ta bay tin mester di forsanan significante pa un ofensiva Ucraniano den sur, pero hopi di e forsanan aki actualmente ta ocupa na Bakhmut.
Presidente Ucraniano, Volodymyr Zelenskyy a suplica aliadonan occidental pa manda tanki cu lo yuda kibra door di liñanan Ruso. Lidernan di Defensa di casi 50 pais a discuti e posibilidad aki na un reunion na Alemania ayera, pero no a yega na un decision, segun minister di Defensa Polaco.
Ucrania mester al menos 300 tanki pa stop Rusia di avansa den provincia Donbas y Zaporizhzhia, como tambe un posibel contraofensa den sur oriente di e pais, segun analistanan. Esaki pa awo ta mustra poco probable.
