Finalmente ayera e decision a cay di banda di Reino Hulandes: a reconoce Juan Guaido como presidente interino di Venezuela, hunto cu un cantidad considerable di pais di Union Europeo, cu ayera a cumpli cu nan ultimatum na Maduro, cu no a yama eleccion liber y a sigui anto e reconocimento di e presidente di parlamento como presidente interino, cu e mesun tarea di convoca eleccion liber. Naturalmente no tin un situacion den e pais ainda, unda Guaido por efectivamente organisa eleccion, pa esey ta hopi cos mester sucede ainda. Esey no ta bay depende tanto di loke nos ta pensa o haci, pasobra loke ta pasa cerca e bisiña a bira asunto ‘top level’ mundial, unda e grandinan di e mundo aki ta envolvi. Y kico e wega grandi ey por tin como resultado?
Pa cuminsa, nos no ta anticipa cu e conflicto aki ta bay desemboca den un guera grandi. Pa yega na esey, ta interes hopi grandi directo di un di e actornan principal riba nivel mundial lo mester ta den wega. Y tambe e escenario mester ta un teritorio suficientemente importante pa Rusia y Merca disputa esey a base di un conflicto arma. Y esey no ta e caso. Como comparacion nos por tuma e anexacion di e peninsula di Crimea, formalmente un parti di e pais independiente Ucrania. Rusia tabata sa di antemano cu e unico cos cu lo a sucede ta e lamento, talbes protesta di e paisnan di NATO indigna, Merca dilanti, pero nada mas cu esey. Por bisa hopi di Putin, pero na nivel di schaak politico el a laga tur e gran maestronan Ruso di historia di e deporte ey leu atras. A sigui poco tempo di murmuracion y despues…, wel, a acepta de facto e realidad cu awor Crimea ta parti di Rusia, of no?
Awor, ban tuma e caso Venezuela. Te awe ainda ta considera e parti di mundo aki, cu nos aden, como e ‘traspatio’ di Merca. Esey no ta implica cu no tin penetracion di e otro podernan mundial, principalmente Rusia y China, den e parti di mundo aki, pero solamente na nivel economico. Asina nos a mira hopi inversion Chines, menos di Rusia, den henter e region di Caribe y den e paisnan grandi riba continente tambe, den e ultimo decadanan. Na Venezuela pa ambos nan interes tabata hopi grandi, pasobra e pais tin algo cu nan ta hopi importante pa nan : materia prima, na prome luga petroleo. Cu tempo e mal maneho di e camaradanan Venezolano a conduci na pidi placa fia, na grandi, y e pais a bira dependiente di e dos podernan aki, pagando su debenan cu VLCC yen di crudo Venezolano.
Y awor cu e camaradanan Chavista no por paga mas, ta te aki e amor revolucionario ta yega, pasobra ora ta trata di canta himno socialista (e ‘Internacional’) hunto nan ta di acuerdo, pero ora ta trata negoshi, tanto Rusia como China ta simplemente ‘business people’. Y ambos pais a siña, di mal manera, cu ideologia comunista ta bon acompañante ora di dal trago, pero pa maneha economia mester di otro metodo. Kico esaki ta significa? Cu ambos pais sa masha bon cu no tin ningun sentido pa nan trata, a costo di hopi capital, y morto di nan mes banda, di mantene un regimen socialista/comunista ‘old school’ na bida, mientras nan sa cu e Chavistanan no ta bay saca e pais y su economia for di e abismo cu nan mes a push’e aden.
No ta nada straño anto cu di banda di China ya caba a duna e señal cu nan lo traha cu cualkier gobierno cu keda o sigui, basta nan haya perspectiva di cobra e debenan biyonario cu e Chavistanan a fia. Rusia ta keda haci un tiki fastioso ainda, pero despues ta laga e asunto pa loke e ta, basta nan tambe haya nan placa hinca den Venezuela. Y nan lo haya esaki tambe, pasobra ta debe cu e pais a haci den un tempo cu e Chavistanan tabata gobierno ‘legitimo’ ainda y e gobierno nobo, cu lo sigui, ta hereda tur e compromisonan aki. Mescos cu nan ta hereda e compromisonan cu Aruba, pero e 350 miyon dollar di responsabilidad pa no por drecha e planta y oper’e como upgrader lo ta un dolor di cabes menor, compara cu e otro seronan halto cu nan mester bay subi financieramente pa pone e pais na nivel atrobe.
Kico esaki tur ta trece cune pa e pais bisiña? Cu Merca ta dicta e paso den e asuntonan cu ta bay tuma luga. Ni Conseho di Seguridad di Nacionnan Uni por haci algo, pasobra mescos cu Rusia y China ta blokea tur paso cu otro paisnan kier a tuma contra Venezuela di Maduro, asina cualkier accion Mericano lo por conta cu su propio derecho di veto den e organo aki. E unico interogante den e wega di ahedres aki ta, cuanto tempo e ta bay dura ainda. Na e momento aki por destila di e actitud di e militarnan Venezolano cu nan no ta bay risca e confrontacion cu Merca. Ora cu no tin cuminda ni gasolin mas, nan lo a yega na e final di e storia aki.
