(FinancialTimes)—Un atake anti-aeronave Ruso por ta e causa di e deriba di un avion di pasahero na Kazakhstan riba dia di Pasco, segun oficialnan regional y Mericano.
E vuelo di Azerbaijan Airlines tabata riba ruta for di e capital di Azerbaijan, Baku, pa Grozny na Chechnya, sur di Rusia, ora el a cambia ruta y a deriba den Kazakhstan, asesinando 38 hende. 29 hende a sobrevivi.
Mayoria di esnan riba avion, un Embraer 190, tabata ciudadanonan Azerbaijani. Tambe tabatin 16 Ruso abordo y varios ciudadano di Kazakhstan y Kyrgyzstan. Den reportahenan preliminar diaranson, Rusia a bisa cu niebla pisa a forsa e avion pa cambia ruta for di su destinacion planea na Grozny y a bisa pa aterisa na Kazakhstan, unda el a deriba despues di probablemente dal un grupo di parha.
Riba e mesun dia, e presidente di Azerbaijan a bisa cu a cont’e cu e avion a cambia ruta debi na mal condicion di tempo. Pero esey a ser cuestiona pa experto- y oficialnan na Merca, e region y Ucrania, ken a cita evidencia cu defensa aereo Ruso tabata operando riba Grozny e momento ey den respuesta na un atake di drone Ucraniano.
Tambe nan a cita imagennan di loke a parce ta daño paden y riba e rabo di e avion kibra. Un oficial Mericano a bisa cu tabata indicacionnan preliminar cu un sistema anti-aereonave Ruso por a dal e avion. Si esaki tabata e caso, e incidente lo sigui subraya e negligencia di Moscu desde su invasion di Ucrania, e oficial a agrega.
Andriy Kovalenko, un seguridad nacional Ucraniano y oficial di conseho di defensa, a publica riba Telegram: “Rusia mester a cera su aire espacial riba Grozny, pero no a haci esaki…e avion a haya daño pa via di e Rusonan y manda pa Kazakhstan, en bes di haci un aterisahe di emergencia na Grozny y salba bida di hende.”
Oficial Ucraniano mayor a confirma na Financial Times cu Kyiv ta kere e Rusonan probablemente a dal e avion. Osprey, un agencia di seguridad di aviacion, a bisa: “video di e escombro y e circunstancianan rond e ambiente di seguridad aereo espacial den e parti zuid-west di Rusia ta indica e posibilidad cu e avion a ser afecta pa un forma di atake anti-aeronave.”
Un oficial mayor den e region Caucaso a bisa cu evidencia ta punta na defensanan aereo como e causa di e deriba riba e area di Grozny. “Si [autoridadnan Ruso ta] bao usa sistemanan anti-aereonave, nan mester cera e espacio aereo,” e oficial a conta FT. “E splicacion mas leve pakico nan no a haci ta incompetencia.”
Si e investigacion, cual ta lidera pa oficialnan di Kazakhstan, descubri cu e avion a ser afecta pa sistemanan di defensa aereo, e incidente lo recorda e deriba di vuelo MH17 di Malaysia Airlines na 2014.
E accidente, cual a resulta den 298 hende morto, a ser causa pa misil lansa pa luchadornan proxy controla pa Rusia den e parti oost di Ucrania, un investigacion separa a conclui. Data for di e servicio Flightradar24 ta mustra cu e avion di Azerbaijan Airlines a stop di registra su posicion continuamente un bes cu el a yega e lama Norte Caucaso, sugeriendo cu su GPS a daña.
Sinembargo, Flightradar24 a descubri algun informacion identificante disponible cu a mustra cu e avion a yega te Grozny prome cu el a cambia ruta pa Kazakhstan. Imagennan for di e sitio di accidente ta mustra e pida dilanti di e avion mita destrui, pero un gran parti di e rabo a keda intacto.
E rabo ta parce di a ser cubri cu marcanan di impacto y buraconan chikito cu por ta consistente cu un atake pa un sistema di defensa di tera pa aire, segun expertonan. “E buraconan den e fuselahe ta hopi similar cu e impacto di e tipo e di proyectilnan cu misilnan aire-pa-aire lo tin ekipa, como tambe e misilnan anti-aereonave lansa pa sistemanan di defensa aereo manera e Pantsir –S1,” segun Ruslan Leviev, un analista militar y hefe di e Conflict Intelligence Team, un grupo di investigacion.
Vocero pa Kremlin Dmirty Peskov a bisa cu tabata prematuro pa specula riba e causa di e accidente. Autoridadnan na Kazakhstan a bisa cu e no tabata etico pa culpa misilnan prome cu e investigacion a conclui.
Un vocero pa e Conseho di Seguridad Nacional na Merca a bisa cu e nacion a mira e reportahenan cu un sistema anti-aereonave Ruso por a dal e avion, pero a referi reporteronan na oficialnan di Azerbaijan y Kazakhstan mientras e investigacion ta continua.
