(NLTimes) – Fighter jetnan Ruso a ehecuta atakenan di menasa siman pasa contra e Zr. Ms. Evertsen, un barco (fragata) Hulandes patruyando Lama Preto, segun Ministerio di Defensa Hulandes a bisa ayera. E barco actualmente ta parti di e Carrier Strike Group di Reino Uni.

E atakenan ficticio a tuma luga diahuebs ultimo entre 3:30pm y 8:30pm, e ministerio a bisa. Minister di Defensa, Ank Bielefeld a bisa cu e accionnan di Rusia tabata ‘iresponsabel’.
E fighter jetnan tabata arma cu misilnan aire-pa-superficie na momento cu nan ‘ripitidamente a acosa e Evertsen’ door di bula ‘peligrosamente abao y cerca’, e ministerio a declara. Ekipo electronico tambe a wordo afecta.

Hulanda a bisa cu su barco tabata riba lama habri, y den awanan internacional. “No tabatin motibo en absoluto pa e accionnan agresivo aki. A pesar di esaki, e atakenan falso a continua durante varios ora. Tabata comportamento iresponsabel y peligroso riba lama”, segun comandante George Pastoor di e Evertsen a bisa den un declaracion.

Gobierno Ruso no a responde inmediatamente na e acusacionnan.

Bielefeld a bisa cu Hulanda lo adresa e asunto directamente cu Rusia. “No tin hustificacion en absoluto pa e tipo di accion agresivo aki, loke tambe innecesariamente ta aumenta e riesgo di accidente”, el a declara.

Tensionnan a escala den Lama Preto recientemente. Despues di anexa y ocupa e Peninsula di Crimea di Ucrania, Rusia ta considera un porcion extendi di awanan di Lama Preto como su teriorio.

Rusia a bisa cu a lansa tiro di advertencia na e HMS Defender di Reino Uni, parti di e mesun Strike Group cu e barco Hulandes. A bisa cu tambe a lansa cuatro bom riba e ruta di e Defender. Reino Uni a rechasa acusacion di Rusia, pero a reconoce cu fighter jetnan Ruso y ehercito a sigui e Defender.

Ministerio di Defensa Britanico a bisa cu nan barco tabata ‘conduciendo un paso inocente door di awanan teritorial Ucraniano di acuerdo cu ley internacional’.

Dialuna, Merca y Ucrania tambe a lansa un ehercicio naval conhunto den Lama Preto.

Siman pasa na e cumbre di Conseho Europeo, prome minister Mark Rutte tambe a bisa cu e no lo participa den negociacionnan entre estadonan miembro di Union Europeo y presidente Ruso, Vladimir Putin. Rutte no tabatin obhecion pa e lidernan di Francia y Alemania, cu a propone e plan, reuni cu e lider Ruso.

“Mi no ta bay participa den un reunion cu Vladimir Putin mi mes”, el a bisa. Mientras e tabata aleha di reporteronan, un a puntra pakico e no lo join e combersacionnan cu Putin. “MH17”, el a contesta.