Ki dia nos ta siña?
Rumornan cu tal o cual hefe di departamento ta perdiendo su puesto ta enrikece e paginanan di diferente medio di comunicacion. Esey no ta nada nobo ora un otro gobierno drenta. Tur e critica cu tabatin durante campaña, berdad o mentira, ta bin halto atrobe den exigencia cu e persona mester bay, o segun e medionan contrario, mester keda. E gobierno cu no drenta cu hacha den man, ta core e riesgo di critica cu nan ta bay mucho suave, di otro banda tur cos cu nan haci pa e banda contrario ta dimas. Con pa nabega den e tipo di situacion asina?
Manera semper, tuma paso bon pensa ta altamente recomenda. Den dos caso den corte recientemente, tabata parce cu gobierno nobo mester a haci su huiswerk miho. Den e caso di e prohibicion di entrada di un periodista na parlamento, hues a haya e medida excesivo y cu facultadnan di e presidente no ta bay asina leu. Aunke ta reconoce tambe cu mester tin orden den e luga y cu no ta asina, manera e periodista a vocifera, cu e o cualkier otro por drenta ki ora cu nan ta desea.
E siguiente caso tabata esun di e puesto di director di Arubahuis, unda gobierno no tabata desea di tin e persona den e funcion ey atrobe, pa motibo cu e lo ta un puesto politico, unda gobierno mester por pone e persona cu e ta desea. Aki tambe gobierno parcialmente no a haya rason, implicando cu mester sigui paga e persona y tambe cu e persona no mester bay traha na e posicion cu gobierno a instrui. Sinembargo, un punto importante a keda para pa gobierno, y esey ta cu e demanda di e persona pa haya e puesto na Arubahuis atrobe, no a keda honra pa hues. Por bisa cu formalmente e no ta un puesto politico, pero den practica, manera ta resulta awor, gobierno toch tin ultimo palabra ta ken ta bay ocupa e puesto ey. Di banda drechi, o banda robes, e confirmacion ta cu e mero hecho di a ocupa e puesto anteriormente, no ta garantisa cu un otro gabinete no por tin otro pensamento.
Loke awor ta presenta su mes, ta algo completamente diferente. Awor nos ta bay den debate, bon informa o no, tocante e funcionamento di diferente departamento, y di esunnan cu ta dirigi nan, den e periodo di gobernacion nos tras. Pero, con e departamento ta opera, o con e director o hefe ta funciona, riba su mes no ta un cuestion di politica, o no necesariamente. Nos ta haya tur tipo di variante den esaki: hende nombra politicamente pero tin e capacidad y experiencia pa dirigi, of no. Hende nombra despues di un proceso cuidadoso y elabora di seleccion, cu ta resulta un bon escogencia… of no. Semper, den tur trabao, control di calidad ta un ongoing thing y no ta na su luga pa comenta den e sentido di cu e persona ta antipatico o hasta arogante, o al contrario ‘e no por ta mal hefe, pasobra e ta asina amabel’…
Ta sumamente necesario pa desaroya maneranan mas sofistica di evalua trabao di un departamento y nan dirigentenan. A proposito, ta necesario di tin realmente criterionan estableci pa husga henter personal di gobierno, y nos tin duda fuerte cu awe na 2018 esey ta e caso. Den esaki nos ta kere cu tin hopi empresa, sigur esunnan cu mas exito comercial, cu tin miho maneho di personal cu gobierno, unda e intento di traha profesionalmente cada biaha ta perde bataya di e metemento politico den trabao publico.
Esey ta implica anto cu gobierno no por haci nada, tanten bo no tin e metodonan aki na nan luga? Esey tampoco ta berdad. Nos ta biba riba un isla chikito y ta conoci cu tin departamento cu pa hopi aña, cu geel of berde na mando, no ta funciona debidamente. Ningun hende por bay pensa cu den un maneho diligente no ta posibel cu ta interveni pa mehora operacion. Loke si ta necesario cu e tipo di evaluacion aki mester tuma luga na un manera obhetivo, unda ta constata cu cifra y hecho den man kico ta e fayonan y kico mester haci pa drecha nan. Despues ta bin e pregunta ken bo mester pa haci e trabao mehora aki y como ultimo ta bin e pregunta si e dirigente(nan) actual ta apto pa continua cu e trabao, segun e directivanan nobo. Y si honestamente un gobierno ta di opinion cu nan mester reemplasa un persona, laga nan cana e caminda legal corecto pa nan yega na nan meta. Pero loke no tin luga pe den nos sistema di gobernacion, ta e imagen di e politico cu ta drenta un departamento ‘cu machete den man’ en busca di esunnan cu mester sali.
Goberna ta un asunto hopi complica, no ta manera bo ta cambia tire di un auto, unda ta basta pa e tin e mesun tamaño y e buraconan pa e bolt nan ta corecto. Entre core cambia cos den pura, y no tarda innecesariamente cu cambio pa mehora, ta sabiduria, y conocemento so ta yuda.
