Juni Odor Rumor Falso (1).jpg

E varios rumor cu ta bay cu ta bayendo rond di diferente estilo di atraco y intento di atraco  no ta berdad mirando cu nan no a haya melding ni a atende e cierto sucedido. Di otro banda polis ni ministerio di Husticia a duna cifra y estadistica pa asina por evalua cu e preocupacion cu ta reina den comunidad tin un base valido.

 

Minister di Husticia (tambe alto comisario) si a confirma siman pasa na Bon Dia Aruba cu e cantidad di atraconan arma ta aumentando. Sinembargo cuanto e aumento ta compara cu e ultimo añanan nan no a bisa, y e pregunta di cua nacionalidad e atracadonan ta, tambe ta keda habri. E pregunta aki di e cua nacionalidad e ladronnan y atracadonan ta, hopi ta haya uno masha importante: hende kier sa si e inmigracion for di Venezuela ta causando e aumento di criminalidad.

 

Tin hopi speculacion di cuanto Venezolano, cu por drenta Aruba sin visa, ta keda atras. Segun ultimo cifranan (2015) tin un 3000 pero esaki no ta nifica cu nan ta ilegal. Antes Iasa, e departamento encarga cu ilegal, tabata duna prensa cifra anualmente. Pero e ultimo añanan esaki no ta sosode mas. Ora di puntra e instancianan di gobierno pa duna un cifra, e contesta ta cu mester ta cauteloso cu cifra. Sinembargo asina e comunidad ta keda cu hopi insiguridad y tin hopi speculacion indicando cu Venezolanonan ta tras tur e kiebro den negoshi, ladronicia den cas y atraconan manera esun ultimo na Wayaca.

 

Aña pasa tambe por a mira e tendencia aki momento cu nos a ricibi hopi turista Venezolano cu tabatin bin pa raspa placa. E ora por mira tambe un ola di acusacionnan di actonan criminal.  E cantidad di turista cu ta bin raspa, a baha considerablemente. Pero te ainda no tin bista riba cuanto Venezolanonan ilegal ta keda awor na Aruba. 

 

Rumor
Manera bisa tin varios rumor circulando entre otro riba rednan social cu ta avisa pueblo pa tene cuidao cu cierto maniobranan nobo di intento di atraco of crimen tumando luga ultimamente na Aruba. Un di esakinan ta pa tene cuenta si bo ta bo so na cas anto bo awa wordo corta, cu bo tin chens cu un persona ta spera bo pafo pa atraca bo ora bo bay check kico pasa bo meter di awa. Tambe, tin hende ta avisa pa den e temponan aki evita cinema, banco y si bo uza ATM pa bo bay diferente sucursal y semper bon acompaña.  ‘”Tur loke bo a menciona te ainda nada no ta berdad. Nos no a haya ningun asistencia of melding asina”, vocero di polis Lito Lacle ta bisa Bon Dia Aruba.

Un ultimo alerta cu a cuminsa bay rond ta pa secuestro di mucha y pa bo no perde bista ningun caminda cu bo bay principalmente luganan publico manera Linear Park. Esaki entre otro ta un aviso cu a bini for di un polis mes segun comentario online. “E hendenan aki no sa mas kico pa inventa”, ta e comentario di miembro di Cuerpo Policial, Michelle Rasmijn.

Generacion di panico of medida preventivo?
 Sra. Rasmijn a publica riba su Facebook personal cu ta berdad cu Aruba no ta e mesun isla sigur y trankil di antes, pero pakico inventa of exagera pa planta panico den nos pueblo.  E comentario di sra. Rasmijn ta sigui bisa cu  ”Ta sigui inventa y exagera haciendo tur hende paranoid y spanta. Mi ta deacuerdo cu nos mester ta atento y nos meter proteha nos mes pero esaki no ta e manera!.”

 

Pueblo kier mira mas polis riba caya
Un grupo di ciudadano cu ta yama nan mes Comision Accion ta splica Bon Dia Aruba cu nan intencion no ta pa genera panico den comunidad pero nan kier yama pa accion. Mirando cu panico den comunidad ta creciendo riba su mes debi na e cantidad di atraco, intento di atraco y crimen tumando luga ultimamente, Comision Accion ta exigi entre otro pa tin mas polis riba caya. E grupo ‘Comision Accion Ta Basta’ ta splica Bon Dia Aruba cu nan ta bay entrega 2 manifiesto den un marcha planea pa 29 di september.  

 

E contenido di esaki ainda ta den proceso di discusion cu partnernan pero ta encera entre otro pa Aruba tin su mesun helicopter bek y miho control na nos frontera. ‘”Nos kier wak mas blauw riba caya.  E insiguridad ta wordo sinti tur caminda anto loke nos kier logra ta pa gobierno tuma accion.  Nos tin hopi sugerencia pa yuda anto nos no kier crea panico den pueblo pero si mantene e pueblo debidamente informa”,  Comision Accion ta bisa.

 

Nan ta  agrega cu nan meta ta pa ilustra e realidad di nos pais cual pa locual no tin necesidad di inventa storia aunke cu por tin hende haciendo esaki. Manera a wordo anteriormente informa, for di fuentenan di polis Bon Dia Aruba a compronde cu tin e intencion pa polis traha mas ora te hasta warda di 12 ora. Segun vocero Laclé,  pa un par di siman caba polis ta controlando pisa y mando policial a ‘upscale’. “FlexTeam ta ocupa, Rapid Response Team, Motorunit, K-9 tur ta ocupa plus cu diferente investigacion andando.”

 

Diasabra Bon Dia Aruba tambe a publica cu gobierno ta cortando den personal di Husticia. Y manera ta conoci ta falta polis, material etc. pa basta tempo caba.