Formalidad legal ta conta pa nos so?

Ayera nos mundo periodistico tabata ariba bao cu e caso di un stranhero, cu via un compania Arubano ta haya un contracto firma pa ‘the Prime Minister himself’… Anto riba papel membreta di gobierno, desde ki tempo ta haci esaki? E compania ta recien lanta, esey no ta pica mortal, riba su mes. Pero por constata tambe cu e no tin sikiera un permiso pa opera, su unico director tin autoridad limita, anto un stranhero ta sinta cu Prome Ministro ta firma contract cu mester tin validez legal? Ultimo biaha cu nos a check, nos Prome Ministro tabatin un titulo di hurista Hulandes.

Pakico el a firma hunto cu un persona cu no tin ningun responsabilidad formal den e compania aki? Of nos tin di haci aki cu un persona cu tin e accionnan di e compania y ta laga otro hende run e compania pe como director? Nada straño cu esey, pero e ora no ta e Arubano director mester firma? Na Aruba hopi hende ta kere cu pasobra nan ta accionista di un compania, nan ta sinti nan mes ‘doño’ di e compania, nan por representa e compania. Por ta cu e desorden legal aki a yega na e despacho principal di e pais aki? Ni Prome ministro no ta respeta reglanan formal di negoshi? Kico ta bay pasa dia bin problema den e compania anto e director ta nenga tur responsabilidad, pasobra e como representante legal no a firma nada? Nos a purba haya confirmacion di e ministro cu no ta trata di un documento no autorisa, pero no a logra.

E ta haci nos corda e caso di e peticion di Roberto Rincón na ministro encarga cu infrastructura, unda e ta bisa cu e ta doño (accionista) di e compania pa cual e ta pidi un tereno na Barcadera. E ministro, cu  den un caso asina inexplicablemente ta haya gana di pasa pa diligente, ta core firma den su estilo custumbra cu e ta di acuerdo. Enbes di manda e peticionario un carta bisando cu e mester laga e compania manda un peticion formal, firma pa e representante legal di e compania, cu ta su director, o un di e directornan si tin mas. Ta e ministro no ta comprende formalidad di ley, o ta nos ta nenga di comprende cu pa e ministronan formalidad di ley ta djis… formalidad?

O e caso di e ministro cu na 2009 ta manda amonesta tur director di empresa o organismo liga na gobernacion pa renuncia nan puesto, mientras cu for di su puesto di ministro, representando e ‘accionista’ (Pais Aruba) e no tin nada ta manda ningun director di compania retira. Tur esunnan cu miedo pa perde nan puesto a core entrega retiro, igualmente tur miembro di delaster un comision gubernamental. Nos ta curioso pa sa nan reaccion dia bin un otro gobierno anto nan tambe ta manda bisa tur aliado berde den delaster un organismo pa nan ‘hit the street’. Naturalmente nos opinion ta cu mester bin un fin na trata otro di e manera aki, pero nos ta djis un medio di comunicacion cu ta duna su opinion.

Y e ta haci nos corda e tantisimo casonan di e ‘coordinadornan’ cu no tin ningun status legal pero ta cana rond tur caminda ta parti orden na ambtenaar. Pero, bolbiendo na e caso actual: ki contraste esaki ta duna, compara cu un caso reciente cu nos a comenta. Den esey, un compania Arubano di hopi aña, mester a aparece cu tur dos su directornan na departamento di Asunto Economico, pa regla un simpel mudanza di e compania. Despues di mas di cinco biaha acudi na e departamento, por fin e asunto a keda regla, ‘que alivio’… Ta parce nos cu e mensahe ta masha cla: regla t’ey pa hende ‘normal’ manera nos cumpli cu nan. Pa mandatario, cu aparentemente tin un posicion di ‘semi-dios’,  tin un otro set di regla, cu no mester ta skirbi ningun caminda pasobra nan mester por cambia nan pa dia si ta necesario, y hasta di mainta pa atardi. Anto djis tene na mente, cu esaki ta e hendenan cu a laga traha un tremendo rapport den añanan 90 bao di titulo ‘Calidad’, cu ta suma tur regla di oro di bon gobernacion, cu cual e gobierno aki no ta tene cuenta at all. Di mes caba cu di e 20 recomendacionnan urgente cu e rapport a menciona, te awe ta dos (2) so a keda implementa.

Mirando tur e desastre di maneho aki den gobierno, kico nos mester recomenda nos hoben profesional? Nan mester enfoca riba esun cu ta brinda e miho perspectivanan pa yega na traha cerca di e ‘semi-diosnan’ pa bo por yega lihe na un status di ‘capataz’ riba e ambtenaar na e departamentonan? Keto bay bo lo mester check bon ken ta bay ta den e proximo gobierno; ta un voto so bo tin.

Otro señal cu nos ta rumbo pa un abismo moral, sin cu nos ta ripara tanto señal di den comunidad pa para e cos aki? Ta di spera cu miedo a kita.