Rugia Siliee, trahando na Hilton Aruba Caribbean Resort ta e trahado cu mas aña di servicio y tin 47 aña den turismo. Rugia ta un trahado dedica y semper Rugia tin un sonrisa ariba su cara y ta trece un alegria enorme na trabou.
Tempo cu Rugia a cuminsa traha den e departamento di Food and Beverage e no tabata sa mucho di e departamento, pero a siña hopi rapido y cu su sonrisa, su carisma semper a pusha pa bay pa dilanti , awor aki e por bisa cu e sa hopi di e departamento y tambe di e industria.
Rugia ta gusta traha cu hende, sirbi hende y yuda su coleganan, ta pesey mes nan ta yam’e un “octopus” paso e no tin miedo pa asisti den cualkier departamento. Rugia ta un persona positivo y semper ta traha cu pasion y amor pa su trabou y ta brinda un servicio excepcional na e huespednan di e hotel.
E conseho cu Rugia tin ta si bo kier traha den e industria aki pa bo tin pasenshi, amor y e spirito di sirbi pa asina bo laga un marca atras di bo caracter y huespednan lo keda puntra pa bo. Aruba ta conoci pa su beachnan pero ta di remarca cu locual ta haci Aruba asina special ta su hendenan cordial y amabel y pesey mes Rugia su deseo pa Aruba su turismo ta pa semper por sigui brinda e mesun servicio, amabilidad y cordialidad di semper.
