No ta facil pa describi riba un articulo e esencia humano di un persona tan creativo y compleho manera esun di e musico Arubiano Rufo Wever, kende awe ta conmemora su natalicio number 100.
E cas unda Rufo a nace y unda a produci su obranan tabata situa den e mesun parcela Wilhelminastraat 33, banda di e negoshi Tienda El Gallo cu mi tata, Jose ‘Toto’ Romero a administra pa basta aña. Tur atardi ora cu e solo tabata cuminsa baha, mi tata tabata laga mi hunga den e terasa dilanti di Rufo su cas, bou e promesa sublime y sagrado cu mi no mag di grita of produci zonido duro pa no molestia e ‘maestro Rufo’. Ta asina cu ami -un mucha di alrededor di 8 aña- a cuminsa scucha e musica melodioso di un piano… Despues cu tempo mi a compronde cu tabata di Rufo Wever.
E personahe di Rufo Wever semper a hala mi atencion. Ma yega di lesa algun di e biografia cu a wordo skirbi di dje, pero masha poco mi por descifra of descubri e ser humano di Rufo Wever den nan contenido. E recuerdonan cu mi tin y cu mi a mira cu mi wowo nan di mucha inocente tabata di Rufo como un persona silencioso, tristo y isola den su propio mundo creativo. E siman aki, mas cu 46 aña despues, Glenda Maureen Diaz, a aclaria mi inkietud.
Sensibel y trahado
Glenda kende ta Rufo su sobrina a bay biba cerca dje ora cu e tabatin apenas 2 aña di edad y su ruman Herbert, apenas algun lunanan di naci. Nan ta yiu di Maria, un di e dos rumannan muhe di Rufo, kende a divorcia y a bay biba den e cas grandi di e famia Wever na Wilhelminastraat. Den nos combersacion Glenda a transporta su mes den pasado ora cu e tabata un mucha pa conta mi algun di e aspectonan humano di su omo pa asina nos por tin un miho comprension di su personalidad.
“E tabata un homber masha trahado, masha sensibel y el a mantene su famia”, asina Glenda a conta. Rufo su ambiente di famia tabata uno evidentemente maternal. El a perde su tata, Civiles Marcial Wever Everts na edad tempran (11 aña) y su mama Leonila Maria Annette Lampe Babijn y su tres ruman Maria, Libia y Lucio a bira su nucleo familiar. E tabata e ruman mas grandi. Na edad tempran el a asumi e responsabilidad di mantene su famia, no solamente su mama, sino e rumannan muhe y nan yiunan cu a bay biba cerca dje. Tur e miembronan di famia cu a keda nan so a bay biba den e cas grandi aki y Rufo tabata responsabel di nan tur. Nan tabata un famia masha uni na otro.
E frase: “Esun cu no ta haya yiu ta haya sobrino,” a bira un realidad cerca Rufo. Nunca el a casa y tampoco no tabatin yiu biologico, pero su sobrinonan Herbert y Glenda a bira su yiunan. Rufo a bira e tata di su sobrinonan; e tabata paga pa scol, cuminda, mantencion, etc… “Nos no a falta nada. Nos tabatin dak, cuminda… Mi tin un infancia masha agradabel cu mi ta corda, caminda mi no a haya falta di nada.”
Si Rufo tabata un persona feliz of no, e ta haya cu e musico aki tabata un persona asina ocupa den su trabou cu e no tabatin tempo pa pensa riba esey. “Mi no a conoce infeliz. Ma conoce preocupa pa su trabou. Mi no a conoce otro manera di Rufo cu traha y soda.” Rufo su mama mester cambia su camisa varios biaha durante henter dia, ya cu e tabata masha trahado.
Bida sentimental y musica
Algun critica riba Rufo tabata cu e no tabata un homber social. P’esey awe den e cuadro di Rufo su 100 aña di natalicio, Glenda kier pa hende haya sa cu Rufo no por a sali y biba un bida social. E motibo fundamental tabata su handicap. Di un banda el a perde su man robes. Di otro banda su pia robes tabata 10cm mas cortico, e tabatin diabetes y na ultimo di su bida su bista a bay atras. Rufo su ruman muhe Maria mester a skirbi algun di su composicionnan pe.
“Con bo kier cu e sali? Con e por hiba un bida mescos cu Padu?…” Rufo a muri na un edad relativamente jong ainda cu 60 aña y dia 30 di december awor ta wordo recorda 40 aña di su fayecimento. Apesar di tur limitacion fisico cu Rufo tabatin, Glenda no por wak su omo haci otro cos cu traha. El a traha caha orgel, cilinder, compone mas cu 400 piesa den diferente ritmo musical, toca piano, graba cu Padu. “Su bida tabata trabou. Mi memoria di Rufo ta un homber cansa y soda.”
E bida sentimental di Rufo ‘bo por tende den su muziek’. E no tabatin novia pero el a compone wals pa ‘Glenda cu Herbert’. Ora cu ta scucha e wals aki bo ta tende muchanan, pues tur sentimento e tabata pone den su musica. Tambe na edad teenager di 18 aña el a compone su wals clasico y inmortal ‘Arubianita’, cu sigur ta un inspiracion di un curason namora.
Rufo a yega di namora varios biaha, un di nan tabata cu un enfermera cu e tabata loco namora di dje. Rufo su condicion di handicap no tabata facil pa e por a haya un persona dispuesto pa sacrifica su mes pe. Solamente su mama a hacie pa hopi aña cu hopi dedicacion y amor. Un gesto di Rufo su stimacion pa su mama tabata e wals ‘Annette’. Esaki tabata e miho forma cu Rufo semper a yega di expresa su sentimento.
Rufo tabata un hende cu practicamente mester a wordo cuida, e no por cana sin su sapato cu un hilchi di 10cm di haltura. E tabata wordo baña ariba cama. Tambe lidia cu ne, prepara su cuminda special. E tempo aya no tabatin e facilidad cu nos tin awendia pa duna e tipo di cuido aki. “Pica mi tin duele di dje. E tabata namora, pero e no ta haya hende pa casa cu ne”.
Glenda a bisa cu e wals ‘Annette’ ta hopi complica y consisti di varios parti cu el a dedica na su mama y eynan nos por sinti su emocion. “Ken ta aprecia Rufo? Ta hendenan cu sa di muziek. Hendenan cu sa e profundidad di su muziek.” E ta haya cu Rufo su musica tin hopi profundidad ya cu e tabata un homber hopi sabi. P’esey e ta wordo hasta considera un genio.
Genialidad y reconocimento
Rufo su genialidad a bay mas leu cu e parti musical so. E tabata un persona creativo cu un cerebro hopi tecnico. E tabata masha inventivo. E tempo aya e mes a diseña su man of protesis y su sapato ortopedico. Te hasta el a re diseña un acordeon, ya cu e no toca e acordeon ey, pasobra e tabatin un brasa so. El a kita parti di e teclanan di e acordeon aki y traha un caha tras di dje, caminda el a pone un hairdryer pa produci biento y asina e por toca e instrumento aki.
E perdida di su man robes a afecte hopi. El a haya accidente na aña 1941 tempo di II Guera Mundial y no tabatin penicilline, motibo cual el a perde su brasa y un pida di e pia. Nan mester a saca un pida di weso y su pia a keda mas cortico cu otro. Aunke el a cay den un depresion, danki na su perseverancia y forsa di boluntad, el a lanta su mes bek.
Rufo a nace cu un sensibilidad enorme den su curpa. Ora bo ta sensibel bo emocionnan ta grandi y bo ta sufri hopi, y ora bo rabia emocion ta grandi tambe. Den esaki Glenda ta identifica su mes cu su omo y tata adoptivo stima, Rufo.
Si nos pueblo a duna Rufo Wever e reconocimento y balor cu e merece pa su contribucion pa nos cultura, Glenda a keda masha pensativo. E ta haya cu e grupo cu berdaderamente a duna honor y aprecia na Rufo ta e musiconan y muy specialmente e musiconan studia cu sa kico ta musica.
