Rueda di prensa… Pa keha riba prensa…?

Un rueda di prensa…, pa keha tocante prensa; esey ta e impresion cu a keda atras despues di e rueda di prensa di dialuna pasa, di nos Promer Ministro. Loke tabatin como tema e negociacion cu Hulanda, encuanto prestamo y supervision Hulandes, no a duna tanto informacion desde e ultimo presentacion den parlamento y loke tabata e principal sucesonan na banda Hulandes. Mas bien a tuma e oportunidad pa keha tocante con, en todo caso parti di prensa, ta atende e asunto. E recomendacion pa sigui e reunionnan parlamentario local cu atencion, envez di esunnan di Hulanda, ta parcialmente na su lugar. A pesar di e desgusto di scucha tanto nonsense di un nivel increiblemente abao, no di tur mester bisa, e ta simplemente trabao pa un periodista. E recomendacion pa NO sigui esunnan Hulandes naturalmente no tin ningun merito. Esey tambe ta parti di trabao y ta incomprensible cu un promer mandatario ta perde tempo cu e tipo di comentario aki. Lo ta preferible dedica atencion na duna informacion mas completo di e negociacion, y si no tin momentaneamente, anto prensa lo tin otro cos di haci cu nan tempo.

Loke en todo caso a keda confirma, no a traves di loke e mandatario a trece dilanti, sino den su contesta riba pregunta di e medio aki, ta e hecho cu gobierno di Aruba ta acepta un ley di Reino di supervision financiero, cu cierto ‘si, pero’ di parti di Aruba, pero esencialmente a cruza e brug caba. Esaki naturalmente ta yama pregunta tocante e desaprobacion di parlamento (11 vs 10) di e proyecto di ley di supervision manera presenta pa Hulanda (RAft). Aparentemente lo tin cierto consenso encuanto un modelo ‘hibrido’ unda ainda lo mester bay di acuerdo cu e contenido di e ley di Reino, y kico ta keda pa regla den e ley di Aruba. Den un anterior editorial nos a detaya caba kico lo ta e reparticion entre un ley di Reino y un ley di Aruba. Con cu bo kier bira e asunto, di ki color bo kier pint’e, ki nomber bo kier dun’e, ta keda un hecho cu no por regla e asunto aki di otro manera; si ta acepta cu lo tin ley di Reino di supervision, ta logico cu lo pone regla y criterionan pa supervision den e ley di Reino… Loke ta keda ta e proceso parlamentario local, pa trata y aproba presupuesto, cu uso di e stipulacionnan cu ta regla den ley caba.

Claro cu lo por bin cu e observacion cu Promer Ministro a bisa cu “supervision no ta problema, tur caminda tin supervision” pero no lo a bisa unda e supervision ta bay ta. “Corecto”, nos lo bisa, pero e palabra ‘supervision’ ta bisa cu e ta textualmente ‘e vision cu ta bin di ariba’; no por comprende esey di otro manera y esey ta indica limite di e autonomia. Awor, unda a yega di tende cu esun cu mester supervision ta esun cu ta grita mas duro cu ta e mester defini e supervision? Den su rueda di prensa nos promer mandatario a trata – atrobe – di crea e impresion cu den e ley di Aruba ta Aruba ta na mando. Esey absolutamente no ta berdad; e ley ta duna exactamente e mesun autoridad na gobierno di Reino pa actua como ‘supervisor’ riba gobierno di Aruba su maneho financiero, cu tin den e ley di Reino pa e dos otro islanan. Cada vez atrobe ta trata di tapa loke a sucede na 2014 y na 2015, tempo cu e delegacion Hulandes a bin Aruba, dispuesto pa impone e supervision via decreto real. Tabata gobierno di Aruba di e tempo ey a desvia e asunto den direccion di loke tabata aparenta un escogencia local, pero tabata simplemente e aceptacion di supervision di Reino. Cu esey a logra scapa cara, y scapa di un supervision via imposicion directo di Reino. E ley local ey por a keda funciona pa mas tempo, pero ta e actual gobierno mes, den un intento absurdo y bobo, a bay purba ‘delete’ gobierno di Reino como autoridad y supervisor for di e ley local. Asina ta cu e actual deseo di Hulanda pa hinca e supervision den ley di Reino ta pa iresponsabilidad di gobierno di e partido socialdemocrata, y nada otro. Hulanda no kier mira mas manipulacion cu e ley local, y un ministro presidente cu a para hari dia su parlamentarionan a aproba e cambio di ley absurdo ey na 2019, no tin ningun credibilidad di por mantene control riba su parlamentarionan ora cada vez e mes ta declara cu “lastima, pero parlamento ta autonomo…”. Pesey ta poni bon cla den e Memorie van Toelichting di e ley di Reino cu Hulanda no ta desea e tipo di wega aki mas.

E pregunta ta kico lo bay sucede den e proximo simannan. Tempo pa delibera ta cabando y nos ta yegando na e momento unda Aruba lo ‘default’ riba e debe cu Hulanda. Normalmente esey ta implica cu e debedor mester debolbe e suma fia di inmediato, y si e no por e acreedor por tuma e medidanan legal pertinente. Den e caso aki esey no ta completamente comparable y hopi lo depende con gobierno Hulandes – demisionario – lo atende e asunto. Pero, como cu ya Promer Ministro a bisa cu ta bay di acuerdo cu un ley di Reino, y e critica riba prensa ta parce nos mas bien un desviacion di atencion, por anticipa un acuerdo di ultimo ora. Pero asina mes nos ta pagando ‘los platos rotos’ caba…