Fin di siman ultimo, Aruba a conoce su reinanan di Carnaval 66 den distinto categoria, como reina infantil, hubenil, Señora y Carnaval pa finalmente Reina di Aruba su Carnaval 66 a keda den persona di Rudyanne Lejuez, kende tabata representa Champagne Carnival Group.

Durante un entrevista special cu Bon Dia Aruba a haci cu Rudyanne Lejuez, el a splica con su caminda pa reina di Carnaval a cuminsa ora el a haya e noticia cu ta participa den reinado un siman prome cu eleccion.

Cu 19 aña, Rudyanne a comenta cu desde añanan pasa e ta den mundo di Carnaval; tempo cu el a haya e titulo di reina infantil 2008, despues reina hubenil 2016 y aña 2020 el a keda como reina grandi cu Miho Show, Miho Costume, Miho Shimis, Miho Speech y Reina Popular. Na mesun momento, el a trece dilanti e anecdota cu e mesun hende cu a corona Rudyanne pa reina hubenil a haci’e pa reina grandi.

Su preparacion pa esaki a cuminsa un siman prome, na unda e no tabata spera cu por haya shimis, costume, show y speech asina lihe. Riba esaki el a comenta cu pa via di ayudo di su grupo di amigonan di baile, tur cos a cuminsa manera un ‘joke’ cu despues a bira un realidad.

Di mesun manera, el a bisa cu a ricibi ayudo di Maribel Andrade, Elsa Krosendijk, y Edgar Kock cu a prepara tur cos pa e por logra su corona.

Asina mes, el a declara cu na e momentonan aki e ta enfoca riba bailamento; despues cu el a caba su scol na Colegio Arubano y kier siña pa juffrouw di scol na IPA.

Rudyanne a bisa cu semper el a crece den Carnaval. “Ta algo cu semper mi a gusta y semper mi kier bay pa reina grandi.” Di parti di su famia, el a comenta cu e prome dianan tabata un ‘sorpresa’ pa nan, aunke den principio su mama no tabata mucho di acuerdo, pero asina mes el a haya sosten di dje, di su rumannan, di su tanta, entre otro. “Mi no por a keha di nada, nan tabata t’ey pa mi, e sosten cu a mi a haya di nan tabata hopi bunita”, el a sigura.

Despues di e coronacion, a surgi un cantidad di comentarionan polemico riba e shimis y costume di Rudyanne riba rednan social. Tocante esaki el a expresa cu e factor ‘tempo’ tabata algo cu e no tabatin na su fabor. “Kico mi por haci den un siman?” Di igual forma, el a bisa cu pa bay den un shimis di 20 of 30 mil florin cu tin cu uza den un anochi durante 10 minuut no ta bal la pena.

“Pa mi, uzando algo cu a wordo uza caba pero no pa eleccion di reina, sino afo, pa mi esey no tabata e cos mas grandi. Un shimis no ta haci bo reina – ta ken ta den shimis ta locual cu ta haci bo reina.” P’esey el a haya cu hendenan a critica pa motibo di e shimis y esey no tabata necesario, pa motibo cu e riba su mes a haci su trabou.

Tocante su costume, Rudyanne a señala cu su mama a bay Corsou pa busk’e y esey tampoco tabata un motibo pa un problema, door cu den ningun caminda tin un regla cu ta regarda cu tur costume of shimis mester ta nobo. Aunke ta un custumber manera e mes a sigura, pero hende tin cu ripara cu tin biaha tradicion mester kibra pa cosnan miho por bin.

“Esaki ta algo cu a pone mi sinti malo, pero na final mi no mester pone atencion riba esey. Ainda falta algun parada y mi sa cu criticanan ta bay ta fuerte riba mi, pero mi lo mustra cu nada lo ta afecta mi”, Rudyanne a comenta.

Ademas, Rudyanne a trece dilanti cu pa motibo di e criticanan aki no tin cantidatanan cu ta bayendo pa reina, nan tin miedo di wordo critica. Den tur eleccion lo ta over di placa y hopi hende ta kere cu pa bay pa reina ta un luho. “Ami no a gasta un cantidad grandi di placa, actitud ta haci tur cos” el a expresa.

Rudyanne a afirma cu esey ta un di e cosnan cu mester cambia na Aruba pa por tin mas reina di carnaval, como tambe pensamento di comunidad. “Tin hende cu no ta pensa riba otro su sentimentonan, ni sa cu tur loke nan ta bisa tin consecuencia. Eesey mi ta haya cu mester cambia den hopi hende na Aruba.”

Pa finalisa, su mensahe ta pa ‘no laga otro persona kibra bo, si bo ta haci bon of malo hende lo papia riba bo’. “Si bo tin un soño y bo kier bay p’e, haci tur loke bo tin y bo lo logra.”