Como candidato politico di Movimiento Electoral di Pueblo pa e proximo eleccion di parlamento na September 24 venidero mi ta mustra riba e importancia di e sinergia di migracion y integracion entre tur migrante cu e ciudadano Arubano.

Actualmente mi ta ocupa e funcion di Secretario di Integracion y Inclusion pa partido MEP. Mi ta contribui den cooperacion cu varios instancia trahando duro riba e sinergia entre e diferente nacionalidadnan y e comunidad Arubano. Nos tin colonianan grandi di Colombia, Venezuela, Republica Dominicana, Haiti, Jamaica, Hulandes Europeo, Argentina, Ecuador, Peru, Brazil y otro paisnan manera tambe Surinam y Republica di China y varios otro. Nos ta papiando di mas di 90 nacionalidad biba na nos Isla.

Diferente crisis

Na inicio di e gobernacion actual, a enfrenta diferente reto, manera crisis financiero, social, migratorio y acerca tin un crisis di salud publico. Por surpasa tur e crisisnan aki cu integracion real di tur esnan kende a scoge Aruba como nan cas nobo y tur cu ta biba aki, pa lanta e pais back. Solamente cu integracion real, empeño di tur cu ta biba aki na Aruba cu su talento y labor ta contribui na e economia di Aruba. E contribucion aki irespecto descendencia y/of origen, credo, rasa of color, Aruba no ta wak esey. Segun nos constitucion tur hende ta igual y den e espirito aki mester lanta Aruba, cu ta e pais na unda nos tur ta biba. Esaki irespecto nos idioma materno. Nos idioma materno na Aruba ta Papiamento, di otronan ta Spaño, Ingles, Frances, Hulandes of otro.

Lanta economia back

No mester segrega den grupo, pero uni como un solo pueblo, mester enfoca pa trece e diferente culturanan mas cerca, den por ehemplo Centronan di Bario den e diferente districtonan. Prome cu e pandemia tabatin diferente actividad den e centro di barionan rond di nos Isla, cu programanan social cultural. Nos mester reactiva nan, pa asina kibra e barera cu tin. Nos tur por ripara cu nos tur tin semehansa di cultura den entre otro e cuminda, bebida, pues asina por mira cu e diferencianan ta psicologico, y ta solamente via di integracion real por lanta e economia aki back,

Mester ta positivo

Tin politiconan cu ta pone enfasis riba loke ta negativo y dividi e poblacion aun mas. Mester por enfoca riba loke ta positivo. Den e situacion actual no tin lugar pa negativismo, pero pa union. Nunca lo tin un situacion perfecto, pero tin cu lucha pa hib’e cerca di perfeccion. Integracion ta esencial pa por asina mehora e producto Aruba. E producto Aruba a sufri bao di expansion di hotelnan sin mucho planificacion cu tur consecuencia cu mester importa trahadornan di exterior riba corto plazo. Esaki a haci impacto riba un integracion natural. Pues, nunca nos lo tin un situacion perfecto, sino nos tin cu lucha y ta consciente pa e por ta cerca di perfecto.

Usa Centro di Bario pa e unificacion

A traves di e diferente centronan di bario y otro centronan mester enfoca mas riba programa social, cultural y educa tocante e historia di Aruba durante e diferente siglonan, e ultimo 500 añanan y con a yega te awe. Pues e diferente periodonan cu Aruba a pasa aden pa yega unda nos ta awe.

E ta hopi importante cu tur Departamento di gobierno brinda un servicio optimal na bienestar di pais Aruba. Tin Departamentonan cu mester traha mas eficiente door di e servicio cu ta brinda na aplicantenan di permiso. Mester tene cuenta cu desempleo local y e necesidad real di admision, pero mester por duna contesta den un tempo mas cortico cu locual ta sosode te cu awor. Esey tambe ta trece tension innecesario pa tur partido envolvi. Den sector priva ta pone hopi enfasis riba e servicio, esaki tambe mester ta e caso den nos sector publico.