Siman pasa diahuebs riba 25 april, 2019 na reapertura di Aruba Tourism Authority San Nicolas su Visitor Information Center mi no por tawata mas satisfecho cu nos minister di Turismo actual Danquillaume Oduber.

Kisas cierto hende lo bisa esaki ta un logro chikito, mirando cu e oficina tawata t’ey caba, pero pa esunnan cu sa di mercadeo esaki ta un logro grandi riba su mes. San Nicolas como districto tin awo su propio logo den e producto di Aruba. Prome e tawata djis un oficina sin compromiso real. E siguiente dia full e team di Aruba Tourism Authority (ATA) tawata eynan pa nan experencia first hand kico ta e vision nobo pa cu e producto. E diasabra pueblo en general a wordo invita un bes mas pa por participa den e Proyecto di Turismo pa tur hende por ta riba mesun linea.

Draaiboek pa atrae turismo
E siguiente lunanan lo wak un draaiboek completo pa atrae Turismo den e area. Su servicionan di restaurantnan manera O’Neils Kitchen, Take-aways y e barnan cu tin den e area manera e conocido Charlie’s Bar.

Tambe e murals y museonan. Tur esaki pa trece un pakete mas atractivo pa turismo combina cu e herencia cultural cu San Nicolas tin di ofrece. Ta invertiendo den Instituto Medico di San Nicolas mas di 60 miyon pa eleva cuido medico na Aruba.Tin hopi mas plannan pa wordo ehecuta manera un Cinema Theater cu lo ta cabando aki un par di luna, mas negoshinan lo establece nan mes den e area di Promenade y tambe algun ideanan mas creativo pa trece mas ‘foot traffic” den e area. Tambe gobierno como trendsetter ta invertiendo mas den infrastructura manera e renobacion di Arubus Mall, Monumentenfonds ta renoba ex-Uncle Louis Store cu lo bira oficina di Directie Milieu en Natuur. Lo tin WiFi den full e prome parti di e ciudad.

Dos proyecto hotelero
Riba 29 mei venidero lo cuminsa cu Island Festival cu tambe ta e siman di Soul Beach Music Festival cu sigur lo ta un boost pa producto Aruba riba su mes.

Anto awo San Nicolas tin oportunidad pa haya su fairshare di esaki. Aruba Entertainment and Carnival Village ta den su segundo fase actualmente cu ta encera 6 kiosco y 2 baño. Tambe FCCA ta trahando riba mas cas social pa cumpli cu e demanda y necesidad lidera pa minister Otmar Oduber.  Nos sa cu tin dos Proyecto hotelero cu gobierno ta bezig cu ne actualmente pa porfin elimina e retraso social economico di e parti aki di Aruba.

Desaroyo regional di San Nicolas
Gabinete Evelyn Wever Croes ta un gobierno di coalicion di MEP/POR/RED cu ta trahando e ultimo 15 lunanan pa ehecuta nos plan di gobernacion “Hunto Pa Aruba 2017-2021”, unda desaroyo regional di San Nicolas y vecindario ta nos compromiso.

San Nicolas mester vibra un biaha mas na un manera sostenibel, manteniendo nos tradicion y nos cultura, convertiendo su mes den e “Cultural and Heritage Capital di Aruba”. Di e forma aki San Nicolas lo bira un di e ingredientenan principal di e producto turistico cu yama Aruba. Ademas lo introduci incentivonan fiscal cu e meta pa stimula desaroyo di sector creativo (creative economy) na San Nicolas. Lo enfoca den e down town San Nicolas, como e areanan di Zeewijk, Boca Grandi, Baby Beach y Rodgers beach, Cero Colebra y Cero Colorado.

Desde 2001 mi tawata kier San Nicolas bira un parti integral di e producto Aruba y awo esaki a bira realidad cerando cu un expresion di nos Libertador: “Nada no ta bin sin sacrificio y sodo. Nos a lucha conhuntamente pa locual no tin awor y p’esey conserv’e pa semper. Si bo a haya algo den teblachi, bo no sa su balor. Pero ora bo mes a lucha a base di sacrificio grandi cu a costa bo sanger, sodo y lagrima, anto e ora ey bo lo no permiti ningun hende mishi cu ne, pasobra esey lo significa Guera!” Betico Croes