Rudy Richardson (MEP): ‘Nos mester sigui inculca amor, respet y tolerancia pa tur conciudadano irespecto nan origen, rasa, religion of credo’

Cada pais tin su historia y di nos no ta diferente. Aruba a sa di crea un sociedad unda cu cada generacion ta sinti un amor genuino pa e teritorio aki. E sentimento aki ta algo noble y no por defini esaki den palabra. Psicologo por interpreta esaki como ciencia, pero e amor pa un teritorio sea bo a nace na Aruba of a bin biba aki no ta algo cu por hunga cune. Nos ta un pueblo multietnico, multicultural y multinacional anto nos no mester buta un grupo di nos sociedad riba otro. Nos mester sigui inculca amor, respet y tolerancia pa tur conciudadano irespecto nan origen, rasa, religion of credo.  Den nos constitucion esaki ta hancra tambe pero tin biaha mester buta enfasis riba esaki. 

Como candidato politico di Movimiento Electoral di Pueblo den calidad di secretario di Inclusion y Integracion (2019-2021) mi meta ta pa yuda crea un sociedad mas husto den tur sentido.  Den e meta aki mi a pidi aprobacion di nos Directiva y Conseho di partido pa nos cuminsa hisa bandera di diferente pais na nos Cede riba nan dia nacional of di importancia como simbolo di respet y solidarismo. E meta di esaki ta pa conscientisa nos digno pueblo di Aruba pa conbibi mas cu esnan di paisnan den region. Un respet mutuo ta e meta. Mi ta kere cu si nos cuminsa aprecia otronan nan contribucion na nos Isla, nos lo por hiba Aruba den desaroyonan mucho mas amplio y concreto. Den tur cambio ta bin resistencia pero pa nos un organisacion politico cu ideologia social democrata esaki no mester ta un problema, al contrario esaki ta nos punto di salida pa enfoca riba un solo pueblo di Aruba.

Mi ta cera cu un quote di nos Libertador Betico Croes efm: “Mi ta pidi merito pa e pueblo di Aruba cu a percura door di su inteligencia, audacia y perseverancia cu nos ta asina leu. Na tur generacion cu ta na bida awe e tratamento aki ta den e espirito di rindi homenahe na e pueblo. Pero pa esnan cu a bay caba, cu a lucha y no a mira e libertad aki realisa, alabes nos ta rindi atributo na nan, pasobra ta nan a pone e base pa nos a sigui traha. E pueblo aki merece un pedestal. P’esey e “Monumento di Libertad” di nos pueblo, no solamente mester ta un monumento den cual cada Arubiano, di acuerdo cu su historia, cultura y identidad ta reconoce su mes.”