Rudy Lampe ta sinti cu e problemanan cu el a haya pa eherce cu funccion tabata pa motibo cu e kier a ehecuta plannan y rapportnan cu tin hopi tempo den lachi. Asina e Minister demisionario a splica, den defensa di su maneho durante e tratamento di Presupuesto 2021.

Lampe tabata centro di mayoria critica, incluso for di fraccion di MEP Y RAIZ, particularmente pa motibo di e werksters di SKOA, cu segun nan interpretacion y calculacion lo keda sin un entrada cu nan por sobrevivi riba dje, si e Minister insisti pa SKOA paga e salarionan for di e subsidio pa opera e scolnan.

E werksternan tabata presente den sala ora cu e Minister a splica cu  no ta kitando pan di ningun werkster. “SKOA mester paga pa limpiesa  y Gobierno ta paga subsidio, pa exploitatie, cu ta inclui pa pago pa werkster. Tur directive di scol, por ehempel Mon Plaisir ta ricibi un subsidio asina.”

Lampe a bisa cu locual a sosode ta cu Direccion di Finanzas a nota discrepancia den e presupuesto di Enseñansa y e como e persona encarga ta responsabel pa e fondonan. A inicia un investigacion y a descubri cu SKOA, sin decision di Conseho di Minister na 2015, a maniobra den e sistema di persona y a cuminza paga e werksternan contra regla y esey a pone cu a surpasa presupuesto. Si Lampe no a tuma paso, e tambe lo ta culpable pa mal maneho financiero y e tambe lo keda deteni, manera ta e caso cu Benny Sevinger.

SKOA a perde dos caso den Corte y aunke cu Parlamentario Endy Croes ta pidi e Minister pa pone man na curazon, realidad ta cu mester cumpli cu ley.
“Ora hasta SKOA a aumenta e cantidad di werkster compara cu otro scol, a haci ehercisio pa pone placa extra presupuesto pa no kita ningun werkster. Despues a bin cu ultimo solucion conforme ley y a bisa e werkster pa keda cu nan trabou, nan no por haya e pago segun e status di ambtenaar, pasobra ta algo cu werksters di otro directivanan di scol tampoco tin.”

Lampe ta lamenta cu SKOA a ataca un organo serio manera Servicio Central di Auditoria, CAD, cu a haci su trabou imparcial y a pone presion pa CAD cambia su ponencianan cu a keda descubri. “Esey ta falta pa organonan di Pais Aruba,” Rudy Lampe a enfatisa.

Direccion di Finanzas a bisa cu e no tin supervision ora cu directivanan di scol ta hinca nan cifranan den e sistema automatisa. Pero e ta kere cu Ministerio Publico lo saca afo unda tur cos a bay robes.

Banda di e problema di werksters cu ta un tema cu tabata pisa serca mayoria Parlamentario, Lampe a ilustra kico tur el a haci y con el a traha, hacienda uso di rapportnan cu tin hopi tempo den lachi,  pero cu ningun otro Minister tabata kier a aplica nan. Entre otro, e nota di maneho di 1988 cu a bisa cu Minister di Enseñansa no por ta hefe directo di personal di scolnan publico. Sinembargo, e no por haci cambio debi na un cantidad di protesta. “Tin un rapport di CAD di 2010 cu a inclui un cantidad di recomendacion pa trece control financiero den Direccion di Enseñansa.” E Minister a bisa cu por ehempel cu Aruba ta paga 30 mil florin pa aña pa cada studiante di IPA, algo cu ta hopi caro, hasta mas cu Universidad di Aruba.

Rudy Lampe ta bisa cu resistencia pa cambio a strobe desaroyo den enseñansa, cu a baha e calidad y no a yuda eleva pensamento critico. “P’esey ora e landspakket a keda firma, nos a bisa cu e revision di  Enseñansa segun norma Hulandes ta nifica cu awor e ta un asunto di Reino. Si nos no a haci e trabou manera rapportnan a mustra, awor ta otro lo haci’e.”

Aloysius y Bonifacius

Lampe a rechasa e ponencia cu ta su persona a duna instruccion pa basha Colegio Frere Bonifacius. Tabata DOW a recomenda esaki y e doño di e tereno cu ta Obispado a bay de acuerdo. Paloke ta St. Aloysius na Noord, SKOA a protesta cu DOW kier a kita parti di e edificio, cu segun Lampe ta structuralmente malo. Pero pa complace SKOA, a permiti e directiva pa haci uso di su mesun architecto pa wak con ta drecha e scol, hacienda uso di fondonan cu e Minister di Enseñansa a permiti e fundacion pa usa.

En todo caso, Minister Lampe a recorda SKOA cu ta su Ministerio a percura pa hisa e suma cu ta subsidia pa cada mucha y e fundacion como tal lo haya mas fondo. Di otro banda, realidad ta si cu e cantidad di mucha cu ta bayendo scol ta birando menos y no mester exclui e realidad cu mester bin fusion di klas.

“Pero ami no ta pone SKOA contra muraya. Ami mester cumpli cu ley, sino mi tambe ta bay ta sera na KIA, manera Sr. Benny Sevinger,” Lampe a bisa.