Diamars mainta Partido RED Democratico a tene un conferencia di prensa na unda nan a elabora ariba diferente tema importante. Ex-Minister di Enseñansa, Rudy Lampe a trece pa dilanti e topico di werksters di SKOA y tambe aumento di schoolgeld.

Lampe a indica cu el a tuma nota di un declaracion di Minister di Enseñansa, Sr. Endy Croes, unda cu e ta toca e problematica di werksters di SKOA. Segun Lampe, Minister Croes a bisa cu despues di varios aña di busca un solucion, a yega na e conclusion cu gobierno ta sigui loke hues a dicta y hues a dicta cu mester paga e werksters conforme exploitatie subsidie.

El a aclaria cu formalmente no ta hues ta esun cu a bisa cu mester paga werksters conforme exploitatie subsidie, ta ley ta bisa esey y hues den e caso aki a pidi pa respeta ley, pero cu asina mes SKOA no a respeta ley, pero tambe politiconan no a respeta ya cu, segun el a indica, tabatin un mocion den Parlamento di Aruba pa busca un otro solucion pa e situacion di e werksternan di SKOA faltando respet pa ley di Aruba.

Lampe a menciona cu Prome Minister, Evelyn Wever-Croes durante su campaña den 2021 a manda un carta rond bisando cu e si ta bay soluciona e problematica di e werksters di SKOA, contrario na su persona, y den Lampe su punto di bista, esey a duna di conoce cu e, Prome Minister, no ta respeta ley tampoco.

El a recorda cu na momento cu Minister Endy Croes a bira minister di enseñansa el a bisa den dos luna e ta bay soluciona e problematica di werkster, pero aworaki dos aña despues e minister ta indica cu no tin otro solucion cu respeta ley, manera Lampe ta sigura cu e ta a bin ta bisa for di basta tempo caba.

“Awo e gran pregunta ta esaki, ora bo a viola ley y bo a causa daño financiero pa miyones di florin na pais Aruba, ta ingredientenan cu ta papia di un forma di fraude. Awo ora minister Endy Croes a bisa cu SKOA a viola ley, cu SKOA a comete daño financiero na pais Aruba pasobra esey e veredicto di hues ta bisa, anto te eynan minister Endy ta yega,” Lampe a señala.

El a agrega cu si Minister Croes no bay cobra back e daño cu a wordo haci, si e no para e daño aki, e ta cometiendo fraude.

“Fraude bo por comete door di haci fraude, y bo por comete fraude door di no bisa nada y no haci nada. Si Minister Endy keda sin para e fraude, sin cobra back e daño cometi na pais Aruba, e ta cometiendo fraude y lo para personalmente responsabel pa esey. Y esey e no ta bisa y esey ta algo grave,” el a remarca.

E ex-minister di enseñansa a splica cu for di april 2020 ya tabatin e prome veredicto di hues y despues 17 di mei 2021 el a bay vorder terug placa na SKOA, pa cual e institucion a hib’e corte y eynan hues a dun’e rason cu e ta rasonabel den su vordering, cual tabata plania pa varios aña, pues e no a kita tur cos di un solo biaha.

“El a sigui cu e terugvordering di SKOA nos Minister Endy Croes? si no e ora e ta cometiendo fraude y por wordo poni personalmente responsabel pa esaki. Y hues den su sentencia ta bisa cu loke ta keda SKOA e ora ey ta aumenta schoolgeld, locual nan a haci,” el a agrega.

Pa loke ta trata aumento di schoolgeld, Lampe a remarca cu aumento di schoolgeld ta contrario na loke tabata su maneho cu el a yega asina leu cu el a paga un consultancy cu a ofrece un plan completo pa aumenta normbedrag. Normbedrag kiermen e mayornan ta paga pa e materialnan pa e studiantenan y di e forma aki no lo mester a aumenta schoolgeld pasobra gobierno ta subsidiando.

El a sigui splica cu normbedrag no tabata ahusta for di 2010 y cu pa motibo ey schoolgeld tabata subi. Durante su maneho, el a indica, el a bin cu un plan den cual den e di tres fase di e plan, cual entre aña 2027 y 2030, e normbedrag lo ta ahusta na loke e mester ta.

Lampe a sigura cu for di 1 januari 2022 nan a laga cla aumento di normbedrag y aworaki directivanan di scol manera SKOA ta haya aumento di normbedrag y aumento di schoolgeld.

“Esaki no por pasobra juist a aumenta normbedrag pa no carga e aumento riba e cuenta di e mayor. Y p’esey ta importante un maneho financiero responsabel. Nos a bay di tal forma cu hasta nos a logra aumenta normbedrag despues di 13 aña y aworaki nos no sa si ta cumpli cu e plan aki di aumenta e normbedrag manera nos a lag’e,” el a resalta.

El a agrega cu durante su maneho nan a logra haci un inversion grandi den e programa di centralisacion di data pa asina por tin un maneho responsabel di educacion, Open EMIS. El a sigura cu e inversion grandi nan haci’e for di e mesun budget sin pidi ni un cen extra y cu tambe nan a trece expertonan di afo pa duna training na e profesionalnan local con pa maneha data.

“Aworaki minister ta papia cu ta bay tin data. Esey ta un proyecto cu nos a inverti den dje ora ami tabata minister y aworaki nos ta mirando e frutonan. Tur scol ta wordo monitoria via Directie Onderwijs unda cu tin tur e data disponibel y hasta por tin un maneho financiero a base di data cu tin. Tur esey nos a laga cla,” el a remarca

Por ultimo, e ex mandatario a subraya cu ta importante pa tin un maneho responsabel di placa di pueblo y no e maneho cu gobierno tin aworaki. “No manera aworaki cu unico cos cu partido MEP ta pensa, con pa chica pueblo, con pa aumenta belasting, con pa aumenta medida pa asina pueblo paga. En bes di pensa con por maneha e budget cu tin di un manera mas responsabel pa e ta mas rendabel, pa e ta mas eficiente pa e ora no cada rato ta chica for di e cartera di pueblo,” el a finalisa.