Ayera mainta durante un conferencia di prensa di Partido RED Democratico, ex minister Sr. Rudy Lampe, a toca e tema di discusionnan cu tin aworaki entre Aruba y Hulanda pa loke ta trata e Ley di Reino di Supervision Financiero (RAft).

Sr. Lampe a cuminsa na informa cu partido RED Democratico a tene su di 20 reunion anual di miembronan diadomingo dia 1 di october.

El a sigui splica cu un persona individual no por participa den un eleccion mas, pero mester forma un partido politico y pa esaki sucede mester crea un asociacion cu tin su statutonan cu ta wordo aproba. El a remarca cu Partido RED ta cumpli cu su statutonan cu ta stipula cu cada aña den luna di october mester tene e reunion anual di miembronan unda ta presenta e relato financiero, relato politico di e partido. Tambe demas comisionnan y instancianan di e partido cu mester haya apoyo di personal ta wordo dicidi pa bo miembronan. Algo cu e ta sigura e partido ta cumpli cune.

“Mi tin cu bisa cu nos pa 20 aña caba ta haciendo esaki, nos ta un partido serio cu pueblo por confia pasobra tin hopi otro partido cu no ta ni cumpli cu nan statutonan y niun hende no ta controla y nos ta bisa si bo kier goberna un pais, zorg pa bo por goberna bo partido segun regla y cu transparencia financiero,” Lampe a remarca.

A traves di e punto aki el a yega na e topico di discusionnan cu tin aworaki tocante, señalando cu si un partido no ta cumpli cu su regla- y miembronan, con e partido por pretende di goberna un pais na serio. “Nos ta mira esaki refleha claramente den e discusion cu tin aworaki tocante RAft.”

E ex minister a referi na un declaracion di Minister di Finanzas, Xiomara Maduro, y el a indica cu ta mustra cu ta un caos financiero tin y cu no tin realmente un maneho serio di finanzas publico di Aruba.

El a agrega cu tin jaarrekeningen atrasa pa varios aña y el a duna como ehemplo Merca, un pais grandi cu ya caba na januari ora aña bolter, tin su jaarrekening cla pasobra cu esaki e pais ta demostra cuanto gasto e tabatin, cuanto entrada tabatin y si e presupuesto tabata ficticio of no.

E ta señala cu na Aruba gobierno ta manehando un pais sin tin jaarrekeningen aproba ni presenta cu retraso, mientras cu Minister di Finanzas ta bisa cu nan ta defende e autonomia y pa e motibo ey nan ta den discusion tocante RAft cu Hulanda.

“Cua autonomia si bo no ta digno di e autonomia aki. Si bo no por presenta jaarrekeningen bo no ta digno di e autonomia,” Lampe a subraya.

El referi tambe na e carta cu Minister di Relacionnan di Reino a manda algun dia pasa. El a enfatisa cu e biaha aki no ta Secretario di Estado van Huffelen esun cu a manda e carta, pero ta e minister mes di Relacionnan di Reino a manda e carta pa Aruba y el a resalta cu Partido RED ta absolutamente di acuerdo cu e mensahe cu e minister a manda y cu nan ta boga pa esey pa hopi aña caba.

“E ta bisa cu henter e discusion di e rijkswet tin di haber cu algo masha simpel mes. Aruba ta acepta of no pa tin normanan di presupuesto stipula pa medio di rijkswet, y nos ta di acuerdo,” el a remarca.

Lampe a sigui splica cu na Hulanda, Francia, Alemania, tur e paisnan grandi ta suheto na regla, na supervision financiero di Burselas y cu nan a acorda ariba dos cos:

Uno ta cu e deficit di presupuesto no por supera e 3% di e producto nacional bruto y e di dos ta cu e debe nacional no por supera e 60% di e producto nacional bruto.

E dos cosnan ey, el a indica, mester ta ancra den e rijkswet. “Mescos cu Hulanda, Francia, Alemania, tur ta wordo supervisa pasobra e dos exigencianan ey ta ancra den e ley Europeo y nan mester mantene nan mes na esey, si nan no cumpli y si nan mal gasta placa, tin sancion. Asina ki tambe na Aruba, e dos aspectonan aki mester ancra den e rijskwet y si no cumpli, si nan mal gasta placa, tin sancion externo ta bin e ora,” el a bisa.

E exigencianan ey, el a splica, ta pa garantisa un maneho responsabel publico. El a agrega cu Union Eurpeo a haci’e pa garantisa e stabilidad di e moneda Euro y cu na Aruba tambe mester haci e palabracionnan aki via rijkswet pa asina tin un organo externo cu ta supervisa, controla y cu por sanciona.

Pero, for di su punto di bista, esey ta loke partido MEP no kier. El a señala cu partido MEP “kier sigui cu e fiesta pa family and friends, sigui mal gasta placa y sigui cu presupuesto ficticio.”

E ex-minister ta ratifica cu hasta cu e solucion hibrido mester ancra den e rijkswet e normanan di presupuesto y e palabracionnan di debe nacional cu tin norma cu ta indica cu e deficit di presupuesto no por ta riba 2%, por ehemplo, di e producto nacional bruto y e debe nacional mester ta te na cierto nivel, cual el a menciona cu IMF ta recomenda no mas cu 40% pa un isla chikito.

“E palabracionnan ey mester bin den rijkswet. Partido RED Democratico di ta di acuerdo pa ancra esakinan den rijskwet,” el a enfatisa.

Lampe a subraya tambe cu como cu Minister di Finanzas y Prome Minister no ta acepta esaki for di Hulanda, aworaki pueblo di Aruba tin cu bay paga mas di 30 miyon florin pa aña.

“Hopi cos nos por a haci cu e placa ey y djis pa nan capricho pueblo tin cu bay paga pa esaki. E ta cumbini Aruba pa tin un rijkswet cu e exigencianan aki, e ta cumbini pueblo di Aruba pasobra no mester paga e interes halto cu ta suma mas di 30 miyon florin pa aña. Kiermen e ta den beneficio di e pueblo di Aruba y toch nan ta nenga, nan ta bay contra beneficio di pueblo di Aruba, contra interes general di Aruba, pa nan interes. Esey nos ta condena,” el a finalisa.