Na 2005 partido Red Democratico a participa pa prome biaha na un eleccion y e programa di eleccion 2005 tabatin como titulo “Na Caminda pa un Isla di Integridad”.

Mi ta quote: “Despues di 1986 ora Aruba a haya su status aparte a surgi un elite politico unda un ta tapa pa otro”. Ta constata cu a surgi un sistema di iregularidad unda no tin control riba e elite politico”. Ya na 2005 ReD ta papia di “e gran cantidad di caso di corupcion cu tin na Aruba” y cu ta necesario pa institui un conseho estatal di integridad”. Posei tabata nos number 1 di puntonan di accion. Y mas cu 15 aña despues nos tin cu conclui cu Aruba ta leu di ta un isla di integridad, manera e caso Avestruz a demostra.

Tabata un dia scur pa scucha Ministerio Publico dilanti huez elabora con un grupo di partido AVP a forma un organisacion criminal pa estafa Pais Aruba. Nos tin informacion fidedigno cu e secretariado di conseho di minister y e lider di AVP a wordo poni na altura for di un fase tempran di e estafa aki, pero cu a tolera y hasta e lider a bai over na pidi pa vota pa e sospechoso principal, Sr. Benny Sevinger. Fiscal a papia di “illegale handel” cu tereno erfpacht, “omkoperij”, “valsheid in geschrifte”. Fiscal a papia cu a actua conhuntamente (“gezamenlijk”) pa estafa Pais Aruba cu e meta di bira mas rico posibel den e tempo mas cortico posibel y cu menos risico posibel. No ta exagera e ora pa califica e partido en cuestion como un forma di crimen organisa.

Ya na 2005 ReD a skirbi den su programa di eleccion 2005 cu “e fundeshi di e sistema aki yama stempelparlement”. Mi ta sigui quote: “E candidato riba nos lista cu mas voto di e ciudadano ta drenta Parlamento y eyden e ta controla nos gobernantenan. E ciudadano ta haya asina poder den Parlamento pa manda un minister corupto cas”. Y nos a cumpli, Ricardo Croes, e votegetter di ReD, no a bira minister sino a keda den parlamento. ReD no ta un partido tradicional y p’esey loke mas ta yama nos atencion ta cu fraccion di AVP e tempo ey a sostene su minister Benny Sevinger y e fraccion actual di AVP a keda sostene e sospechoso di corrupcion Benny Sevinger. Aki partido AVP a perde tur credibilidad, pero na mesun momento e ta mustra cu un fraccion den Parlamento ta djis un adorno e ta.

P’esey ReD su solucion a dal e martiw riba e cabez di e clabo y te awor ReD ta e unico partido cu tin e solucion, cu e fraccion parlamentario ta controla di berdad su minister y por manda un minister corupto cas.