No tin sosten pa e plan di Minister di Enseñansa pa fusion di Emma School y Scol Paso pa Futuro. Coalicion y oposicion no ta compronde e maneho di Minister di Enseñansa Rudy Lampe pa bin cu plan di fusion di Emma School y Scol Paso pa Futuro, sin cu tin sosten amplio pa esaki. Fraccion di MEP a bisa bon cla cu no ta sostene e plan. Y no tin otro opcion pa e Minister pa hala e plan atras. E ta nifica cu no ta bay tin mudanza di Scol Paso pa Futuro pa Emma School tampoco y tur cos ta keda mescos.

Sinembargo, pa Minister di Enseñansa, e tabata importante pa duna un ilustracion di locual e ta considera un atake delibera pa stroba desaroyonan den enseñansa, cu mas bien tin motibo politico, esta pa kibra coalicion. Pasobra den su concepto, e oposicion di lidernan sindical a cuminza for di principio pa motibonan cu e mes ta cataloga como politico.

E titular di Enseñansa a duna un ilustracion con cada biaha lidernan di SEPPA y SIMAR tabata informa nan miembronan cu nan no ta bay papia cu Minister Lampe, sino unicamente cu Minister Presidente y asina mes tabata acus’e di no kier dialoga. “For di prome dia, tabata nenga di reuni cu Minister di Enseñansa,” Lampe a bisa, referiendo na e prome confrontacion cu a bin tres aña pasa, relaciona cu Trai’Merdia.

Organo di control

Rudy Lampe a bisa cu e ta contento cu Parlamento a manda yam’e pa e informa di con tin tanto manifestacion su contra. E lidernan sindical cu ta informa docentenan cu nan no kier reuni cu Minister di Enseñansa no kier solucion, den su concepto. Pasobra aunke cu nan ta pidi pa papia unicamente cu Minister President, nan sa cu pa ley, ta Minister di Enseñansa ta responsabel pa ehecuta maneho. Ningun momento sindicatonan tabata habri pa yega na dialogo y asina traha hunto pa mehora enseñansa na Aruba.

Pero e mester duna cuenta na Parlamento, y segun Lampe, esey ta bon. Pasobra Parlamento mester controla. Y ta netamente esey, su Minister a haci, esta purba trece bao control un sector cu a bay for di man. Ehempel ta rapportnan for di 2007 di Inspeccionnan di Hulanda y Aruba cu a produci recomendacion pa Colegio Arubano, pero ningun Minister kier a implementa pa medio di trapa dede di hende y perde voto. Mescos ta conta pa Colegio San Nicolas.

Pa loke ta responsabilisacion di placa, Direccion di Enseñansa a admiti di no tin e capacidad pa controla. “P’esey cos a bay out of control. P’esey ta haya e situacion di e werksters di SKOA, unda riba nan mes un bestuur ta nombra mas di 100 como ambtenaar sin decreto ministerial, sin cu e ta presupuesta. Ta Directie Financien a hala mi atencion pa un suma di salario di mas di 3 miyon pa aña cu no ta aproba ni presupuesta. Asina por keda menciona ehempelnan cu nos a cuminza eherce e control.” E Minister a bisa cu otro ehempel tabata Trai Merdia, unda docentenan cu ya caba tin trabao full time mainta, cu ta 40 ora pa siman, ta traha tambe merdia pa un otro organisacion, tambe 40 ora pa dia oficialmente. Den otro palabra, e situacion na Trai Merdia tabata trata di hendenan cu tabata traha formalmente 80 ora pa siman. Y esey e kier a coregi.

Sosten amplio

E Minister a bisa cu su intencion semper tabata pa busca sosten amplio y a reuni cu tur actor, incluso docente y sindicatonan pa e Plan Educacion Nacional 2030, cu ta un plan strategico pa 10 aña. Pero los di cu a scucha docentenan, tambe mester scucha mayornan, e Minister a bisa. El a presenta testimonio di un mayor cu tabata hopi frustra cu su yiu no a logra un bon test di IQ, a keda sinta varios biaha, entre otro pa motibo di idioma Hulandes te ora cu e mucha a drenta un programa na Ingles, online y diripiente e mucha ta logrando bon, y ta sinti su mes hopi sigur, te cu e ta traha plan pa futuro.

Pa e Minister e caso aki y otro, ta ilustra cu enseñansa na Aruba mester reforma pa brinda mas alternativa na muchanan, y sigur teniendo cuenta cu e problema di hopi cu Hulandes. “Metodologianan tambe ta cambia. P’esey e Scol Multilingual ta importante, unda muchanan ta haya Papiamento como idioma di instruccion den e prome aña. Pero, tambe tin un proyecto piloto cu Muchila Creativo, unda muchanan cu ta ZMLK (Zeer Moeilijk Leerbare Kinderen) ta haya habilidadnan nobo pa medio di inteligencia artistico. E grupo di muchanan aki ta sigui les via computer, y ta demostra habilidadnan cu normalmente no lo a keda desaroya.

E Minister a urgi pa Parlamento wak interes di e muchanan special y nan derecho pa logra diploma y haya oportunidad. E forma con ta maneha educacion pa muchanan MLK na e momentonan aki no ta optimal. E ta hasta contra ley pa laga e muchanan den scolnan manera Emma y Paso Pa Futuro keda sinta, pero esey ta sosode. Y riba dje, na Emma tin alumnonan di 13 pa 15 aña cu a laga atras, pero cu en realidad mester ta na SPO, pa nan por haya un continuacion di enseñansa. Sin e posibilidad aki, e muchanan aki no ta haya un diploma ni oportunidad pa drenta mercado laboral.

Minister Lampe a splica cu e ideal ta pa crea un sistema inclusivo unda tur mucha, hasta esnan MLK por bay scol regular, pero cu sosten adicional. Esey ta e vision di Nacionnan Uni. Pero ni Hulanda ta cla pa algo asina, como tal na Aruba lo sigui manera e ta awor. Esta tres scol MLK, cu ta inclui Emma y Paso Pa Futuro.

Fusion

Di otro banda, e cantidad di alumno pa MLK no ta hustifica dos edificio grandi. Emma School tin 87 alumno y Scol Paso Pa Futuro tin 95, mientras cu a traha Emma School pa 200 alumno. E ta e unico scol na Aruba cu 18 klas. Scol Paso Pa Futuro cu ta ubica na ex Mater Dei na Playa, tin hasta klasnan cera. E pensamento tabata pa haci un fusion entre e dos scolnan aki, unda ta crea miho facilidad pa alumnonan di ambos. Y e edificio di ex Mater Dei lo bay e ora pa Beatrix School cu na e momentonan aki tin su 300 alumnonan reparti na tres diferente luga, cu ta costa Gobierno hopi na huur.

Durante un reunion di cuater ora na Emma School, a splica kico tabata e intencion y durante e reunion e docentenan no tabata de acuerdo cu ta bin cu e fusion y a sugeri pa haci esaki den fase. Rudy Lampe a bisa cu el a tuma esey den consideracion y e plan tabata pa no uni e organisacionnan, sino cu e fusion lo ta unicamente fisico, sinembargo cu facilidadnan di ekipo y personal, manera assistent di klas cu ambos scol lo por probecha di dje. “Un di e scolnan tin falta di docente, e otro tin suficiente. Y ambos lo por haci uzo di e Sociaal Pedagogisch Hulpverlener.”

Pero den concepto di Lampe, aki a drenta un atake politico contra dje atrobe. SIMAR a protesta, a cita rapport di IMF incorectamente, y hasta a avisa docentenan cu e Minister lo kier a pone Emma School na candal. Esaki mientras cu e intercambio cu e Director tabata pa e bin reuni na DPS despues di orario di scol. Den otro palabra, tabatin manipulacion pa mustra comosifuera e Minister no kier dialoga y no ta comunica.

Lampe a bisa Parlamento cu mester sigui cu ley. Y ley ta determina cuanto mucha por tin den un klas, Di minimo te maximo, y cifranan ta mustra cu e cantidad di mucha pa enseñansa basico, incluso MLK ta bahando. Entre 2013 pa 2020 tabatin 761 mucha menos cu a drenta scol. “Pa mi conclui, den e añanan aki como Minister mi ta bin cu un plan, mi ta habri pa ahust’e tel e bij, manera a sosode na varios ocasion. Pero si resulta cu mayoria den coalicion y den Conseho di Minister no ta sostene e plan di re-alocacion di e dos scolnan, Emma School y Scol Paso Pa Futuro, esaki lo no sigui.” Lampe a enfatisa cu e no ta bay pone e gabinete Wever Croes den peliger.

Honor

Mester bisa cu excepcion di Ricardo Croes di RED, mayoria den Parlamento tabata critico contra Minister Lampe. Edgard Vrolijk di MEP a expresa mesora cu e lo no sostene cualkier fusion, y Shailiny Lee a expresa preocupacion cu locual el a compronde, esta cu tempo, MLK lo desaparece. Sinembargo, e Minister a reitera cu esey no ta e caso.

AVP di su banda ta haya cu mirando tur e turbulencia di ultimo añanan, motibo pakico no a retira Rudy Lampe ta netamente pa motibo politico, esta pa no laga e Gabinete Wever Croes bay cas. Mike de Meza a pone skerpi bisando cu “locual fraccion di AVP ta haya straño ta con e coalicion ta sigui sostene un Minister cu desde prome dia caba a haya problema cu tur area di enseñansa. E unico solucion pa enseñansa ta pa e Minister tuma honor na su mes y retira, of si Ministerrraad retira e Minister. Hasta den Parlamento e lo no pasa, pasobra coalicion lo no laga e Minister cay pa motibo cu no kier pa Gobierno cay,” ta conclusion di De Meza.

Minister Rudy Lampe a bisa na final cu e plan di fusion no ta sigui pero a mustra Parlamento, cu sin reforma di enseñansa, sin cambionan structural, no ta brinda alumnonan di Aruba e confianza ni siguridad cu nan mester pa bay dilanti. “Mester bin reforma, pa crea competencia cerca e muchanan y crea un base cu ta duna muchanan autoestima. E sistema actual di enseñansa ta kibra e autoestima di mucha, pasobra for di momento cu un mucha ta bay Emma School, ya e tin stigma. Mescos pa esnan cu bay EPB y tur tin nan balor. Si e mucha ta experiencia cu e sistema no ta balora e scolnan aki, e no ta yuda e alumno. P’esey mester reforma educacion pa yuda tur mucha,” tabata su comentario.