Splicacion y detayenan di e ley di BTW ta dificil pa premira su impacto. Aunke RED ta pro un BTW, e partido ta sostene pensamento di CAft cu e forma con Minister di Finanzas Xiomara Maduro ta trahando riba e ley cu mester drenta na vigor 1 di Januari 2023, e no ta duna indicacion di seriedad.
“MEP ta haci e proyecto complica,” ex colega di Xiomara Maduro, esta dr. Rudy Lampe di RED a bisa Bon Dia Aruba. “Den e landspakket ta poni cu Aruba ta encarga cu n’e. Aruba a firma pero no a ehecuta nada cu a palabra. No a baha gasto di personal, pero nan ta corta di salario di ambtenaar,” Lampe a bisa, ilustrando cu e cortamento di salario no ta e palabracion sino cu esaki tabata un medida temporario. “Kiermen nan no ta serio cu Hulanda y mi no sa cuanto Hulanda lo wanta. Nan ta tuma Hulanda pa kens.”
Pa Rudy Lampe, e ta algo di lamenta pasobra “nos ta perdiendo oportunidad pa reforma nos pais. Asina a sosode cu cannabis. Nos a palabra algo como coalicion na 2017,pero no a ehecuta e palabracion. Pues no a crea pilar economico nobo.” Pa RED e ta hopi cla, e modus operandi di MEP ta yega na palabracion pero no ta implementa esakinan. Consecuentemente e partido tin miedo cu hopi di e reformanan cu ta pa bon di Aruba lo no sosode tampoco.
AVP no tin credibilidad
Rudy Lampe ta lamenta cu e partido mas grandi den oposicion, esta AVP no ta yuda e situacion. E ex Minister ta de acuerdo cu e critica di AVP riba e forma con Minister Glenbert Croes a maneha e fondo di FASE y su decisionnan na DIMAS, te cu e huez a bati riba su man. “Pero den e mesun rosea, lider di AVP, Mike Eman a bisa pa no cobra e subsidio di salario cu a paga di mas na comerciantenan. Mescos cu e hecho cu a entrega mocion pa SKOA por haya subsidio pa e werksternan. E no ta na interes di Pais Aruba. Esey ta simplemente hunga politica.”
Den concepto di Lampe, mester ta consecuente como partido serio aunke cu esey ta nifica cu ta perde voto. “Si algo ta contra ley e ta contra ley. Un partido oposicion cu no ta consecuente no ta yuda Aruba awor aki.”
Raiz
Rudy Lampe a bisa cu e kier duna oportunidad na politiconan no tradicional, esta esnan cu no ta forma parti di ni MEP ni di AVP. “Mi ta aprecia ciudadanonan cu ta haci intento pa drenta politica no via e dos partidonan aki. Pero di otro banda, Raiz a haya carteranan cu nos como RED no a haya na 2017. Nos a pidi e tempo ey e carteranan di Integridad, Economia y Sector Primario, pero MEP a nenga. Nos por a tuma Enseñansa so. Pero RED na 2017 no tabata e yabi pa Gabinete Wever Croes 1. Esey tabata partido POR. Raiz si ta e partido yabi.” Consecuentemente Lampe no ta compronde con Raiz cu tin e cartera di Integridad, ta acepta cu Glenbert Croes ta keda como Minister.
Sinembargo, pa realmente trece mehoracion na Aruba, ta pueblo mester vota diferente. Sin e voto di pueblo, politiconan tradicional lo sigui haci locual semper nan a haci, segun Lampe, esta mal maneha fondonan di Aruba. “Ta e votadornan ta pone MEP y AVP eynan.”
Pa RED, no tin opcion pa duna por venci. Hulanda lo no bay yuda si Aruba no ta serio cu reforma. Comunidad mester bira consciente cu ta importante cu ta scoge lidernan cu ta drecha cas y goberna drechi.
