Rudy Lampe ta subi lista di RED. E biaha aki e ta cera e lista. Si haya aprobacion di e reunion di miembresia cu lo tuma logra dia 2 di juli proximo, e ta bisa.
“Mi ta pidi pueblo husga mi pa mi obranan. Si un hende tin prueba cu mi a enrikece mi mes inhustamente riba custia di pueblo, lo mi retira de inmediato di politica. Si un hende por demostra cu mi ta hiba un bida di luho sin cu por hustifica di mi entrada, mi ta retira de inmediato di politica. Si un hende por demostra cu mi tin negoshinan, manera television, radio, uitzendbureau, you name it, of un bida di luho den un suit di 2 miyon, of cas na Malmok, sin cu mi entrada ta hustifica un bida di luho asina, mi ta retira de inmediato di politica. Ma hiba un bida honesto y humilde, pa 25 aña mi a traha como sacerdote sin cu mi a cobra salario pa mi trabao sacerdotal. P’esey mi ta pidi pueblo husga mi pa mi obranan, pasobra Aruba mester di lidernan cu no ta stima placa.”
Lema di su campaña ta ‘Voz di pueblo den parlamento’. E tambe ta informa cu pa e partido e secuencia riba lista no ta di importancia. “Cual sea e posicion riba lista, ta e candidato(nan) cu logra mas voto (cu un diferencia substancial di voto) lo cubri asiento den parlamento. Mi ta priminti for di awor cu despues di eleccion ta conoci, lo mi respeta e declaracion firma aki, aunke cu pa ley mi por tin derecho riba e asiento, aunke si mi a haya por ehempel un (1) voto so.”
Finalmente e ta bisa cu e ta keda kere cu Aruba mester di un ‘zakenkabinet’. “Awe mas cu nunca.”
