Rudselyne de Kort, conoci como Rudsy pa su famia y amistadnan, ta un hoben di 30 aña di edad cu a gradua di Universidad di Aruba como Meester in de Rechten e aña aki. Actualmente e ta traha como hurista na Richbar Attorneys & Corporate Advisors, pendiente riba su fecha pa huramenta como abogado. E ta conta di su bida, su estudionan y con diferente aspecto di su bida a yud’e desaroya den e persona cu e ta awe.

Di chikito e tabata envolvi den e mundo di farandula, baile, modelahe y e tabata presentadora di television. Den esaki el a haya oportunidad pa biaha bay afo y representa Aruba den certamen di beyesa y baile. Apart di esaki Rudsy tabata gusta haci deporte tambe, e tabata hunga futbol y volleyball. Semper e tabata ocupa cu diferente actividad y esaki ta un aspecto cu e tabata gusta masha hopi mes.

Durante su educacion avansa, Rudsy tabata activo ainda den diferente actividad y despues cu el a gradua di Colegio Arubano, el bay studia na Flagler College na Florida, na unda tambe e tabata activo den e ekipo di baile di e scol y den e organisacion di trabao boluntario Enactus, cu tabata enfoca mas den e direccion di su estudio, cual tabata business administration.

Despues cu Rudsy a ricibi su Bachelors den Business Administracion, su intencion tabata pa bin back Aruba y despues bay Hulanda pa continua cu s estudio, pero pa motibonan familiar el a keda Aruba.

Na e momento ey el a dicidi di bay Universidad di Aruba (UA) pa wak den ki direccion e lo por continua su estudio y ley semper tabata algo cu e tabata interesa den dje.

“Mi a bisa laga mi purba un aña pa wak con e ta bay, y e un aña ey a bay hopi bon, mi puntonan tabata super bon y mi tabata gusta y mi tabata hay’e como un desafio. Y mi a bisa si e ta bay bon y mi gusta, pakico no sigui,” Rudsy ta conta.

E ta remarca cu e no tabatin ningun plan pa loke ta e estudio aki y durante su ultimo aña di masters, e oficina di abogado unda e ta trahando actualmente tabata buscando un stagiaire. Nan a tuma contacto cune pa haci un stage di dos luna, cual a bay hopi bon y nan a pidie pa keda traha como huridische medewerker. Pa mas cu un aña, te ora cu el a gradua na januari, el a traha den e posicion ey y na januari el a ricibi e oferta pa sigui traha como hurista, te ora cu e huramenta y ricibi e titulo oficial di abogado.

“E no ta algo cu mi e plania, e ta algo cu a djis sucede, pero e ta algo cu di momento mi a cuminsa mi interes a djis bira mas grandi,” el a enfatisa.

Actualmente Rudsy ta studiando un otro carera y el a splica cu no necesariamente e ta cambia di carera, pero personalmente e ta sinti cu e carera cu el a gradua cune na Flagler College, e no a termin’e y e kier finalisa esaki.

Despues di un anochi informativo el a haya sa cu UA tin masters den business administration, cu ta dura dos aña, y asina el a haya interes pa termina su masters di business administration.

Rudsy ta conta cu e parti bon di esaki ta cu e oficina unda e ta traha ta specialisa den ley corporativo, locual kiermen cu su masters den business administracion ta bay man den man cu su masters den ley na unda e traha actualmente.

Manera ya caba menciona, Rudsy tabata activo desde chikito den diferente actividad, esaki, el a subraya, a yuda form’e den e persona cu e ta awe. Sobretodo e aspecto di deporte y baile, cu ta actividadnan cu el a practica ariba nivel competitivo cu ta haci cu e mester a mantene disciplina, sigui pa dilanti, no djis cuminsa algo y no cab’e, vooral si e mester a competi.

“Bo tin un meta final, bo mester train duro y traha duro pa esey y esey sigur ta refleha awe cu mi estudionan. Vooral den e estudio di ley, cu tin ora ta bira hopi dificil y ta yega un punto cu bo ta pensa si esaki di berdad pa mi. Mi actividadnan di pasado a yuda mi pasobra bailamento, vooral ora tin competencia of den un deporte, bo tin cu sacrifica diversion y bida social, locual otro hendenan di bo edad tabata haciendo, bay pelicula of cosnan asina, mientras cu abo tabata pasa full weekend ta train un baile pasobra tin un competencia, bo tin cu biaha of pasobra tin un presentacion,” el a enfatisa.

Na edad mas grandi, Rudsy tabata haci crossfit y despues di crossfit el a wordo introduci na e deporte di olympic weighlifting. E ta conta cu esaki ta un deporte cu te dia di awe e stima y aunke aworaki e no ta practicando mas, e ta spera cu den futuro e por cuminsa atrobe.

E ta sigura cu e deporte aki a yud’e caba su estudio di ley pasobra e tabata un deporte cu tabata un reto mentalmente y na mesun momento e tabata un distraccion p’e y eyden tambe mester disciplina, schedule training cu su estudio y te hasta prepara pa competencia despues.

Cu apenas un aña practicando e deporte aki ya Rudsy a sali na di dos luga na Aruba, locual tabata un triunfo grandi p’e, pasobra el a cuminsa hacie como un distraccion, como un hobby y su trabou duro a keda refleha den su progreso y esey a hacie interesante p’e.

Pa loke ta futuro, aki 10 aña, Rudsy ta conta cu e ta wak su mes trahando den su profesion cu hopi mas experiencia, cu hopi mas conocemento den tur area di ley, pasobra ley ta algo hopi compleho, tin hopi aspecto di dje y e ta spera di por siña lo mas cu mi por di tur cos.

Rudsy ta remarca cu e tin e ‘entrepreneurial spirit’ tambe y den futuro e ta spera di por balansa su profesion cu e aspecto aki di su bida.

Su mensahe pa comunidad, specialmente pa hobennan: “Mi ta kere firmemente den educacion, pero mas cu esey mi ta kere den haci loke bo gusta. Berdad bo mester tin un plan y bo mester guia bo mes y traha duro pa bo futuro, tur esey ta berdad, pero mas importante ta haci algo cu bo ta echt gusta y wak kico bo por haci cu esey. Mayoria hende cu a trece cambio na mundo ta pasobra nan a sigui nan pasion y nan por a haci hopi door di esey,” el a finalisa.