E biaha tur cos no a bay manera custumbra durante temporada di entrega klapchi. Ainda riba dia 27, 28 y 29 di december ultimo, nan tabata habriendo e containernan cu a yega laat, y esey a haci cu nan agenda a cambia un tiki.

Segun Rubin Ponson kende ta experto den explosivo di DOW, esaki tabata un factor cu a haci cu ayera y awe nan ta bay tuma e klapchinan cu a resta bek. E ta haya cu nos tin demasiado klapchi riba nos isla. Apesar cu e containernan a yega laat, e no ta kere cu esaki eventualmente por a tin influencia riba benta di e producto aki. Ademas pa dia 29 ya caba nan tabatin tur container afo.

E benta a wordo concentra mas tanto riba dia 30 y 31, ya cu prome cu esey, no tabatin presencia di cumprado na gran escala den e puntonan di benta. E ta mira cu ta birando un tendencia pa e cumprando laga te ultimo dia pa cumpra nan klapchi. Mientras cu antes e benta tabata cuminsa for di tempran. E tendencia aki por tin su efecto riba e benta cu eventualmente ta birando menos. Antes e hendenan cu tabata cumpra mas tempran tabata bolbe cumpra pa fin di aña.

Hopi klapchi.
E ta calcula cu cierto cantidad di klapchi a resta, mirando cu dia 30 y 31 ta dianan cu normalmente nan ta bende mas. Pero e biaha aki, nan por a ripara cu dia 31 di december ultimo y den oranan hopi laat di atardi, e sitionan di benta a cuminsa bira hopi ocupa. Di otro banda hopi klapchi tabatin na benta mas cu e aña anterior 2018. E biaha aki tabatin mas cu 24 container di klapchi cu a wordo distribui na diferente sitio rond di nos isla pa bende nan.

“Si nos ta mira e cantidad aki, mi ta kere cu sigur nos tin basta klapchi pa bay warda. Apesar cu hopi a wordo tira,” el a bisa.

 

Ponson a bisa cu durante e control rutinario cu nan a realisa na momento di habrimento di containernan, control riba e productonan y control riba e sitionan di benta, tambe nan a confisca diferente klapchinan. Entre nan klapchinan ilegal cu no mag di importa mes y cu nan benta ta prohibi na Aruba.

Tin diferente sitio cu a wordo cera pa motibo cu nan no a cumpli cu e reglanan. Pero unda bes cu nan a cumpli cu e regla, nan a wordo habri bek. Tambe nan a constata cu tabatin un sitio cu tabata bende klapchi sin permiso banda di un pompstation. E klapchinan aki a wordo confisca y tin un proceso cu lo cuminsa cana pa wak kico ta e sancion pa e persona cu a haci e acto aki.

“Esaki ta un motibo tambe cu nos tin cu busca awor caminda pa warda esakinan. Of move nan pa nan por traha espacio pa e restante cu mester bin ainda na Wela,” el a bisa. Ya caba diferente sitio di benta di klapchi a tuma contacto cu nan pa warda nan productonan cu a resta.

Ponson no tabatin un bista cuanto por a resta, pero e ta pensa cu hopi klapchi a keda sin bende. Esaki apesar cu e biaha aki e ta haya cu hopi klapchi a wordo tira. Pero e no ta kere cu aña 2019 a bay miho cu aña 2018 pa e bendedonan di klapchinan. Ponson a bisa cu pa loke ta e cantidad di klapchi cu a wordo tira por tabata mescos of un tiki mas of un tiki menos. Pero mirando e cantidad di klapchi cu tin, e no ta duda cu e tabata hopi mas cu añanan anterior. Esaki ta duna nan e impresion cu kisas na final nan lo tin hopi klapchi pa warda atrobe e aña aki.