Rubin Ponson ta e persona encarga tur aña pa e transporte y observacion di e klapchi na Aruba. E temporada di Pasco ta tras di lomba y klapchinan ta na Aruba for di cuminsamento di december caba, unda cu a importa e klapchinan y a haci e trabao di control tambe.

A habri e containernan y a reparti esakinan riba wela y awor cu Pasco a pasa ta preparando pa saca e klapchinan y reparti esakinan na e diferente puntonan di benta cu tin riba nos isla, pero cu ta bay sucede dia 27 di december madruga pa asina mainta nan ta disponibel pa bende.

Sinembargo e puntonan di benta a bira menos cu aña pasa y esaki ta debi di e cantidad menos di klapchi cu a keda importa. Den totalidad e klapchinan cu tin na e momentonan aki riba nos isla ta menos cu e añanan anterior.

A pesar cu ya caba den tur e añanan ta mira cu e benta ya caba ta bahando y aña pasa tabatin un cantidad di klapchi cu a sobra y cu mester a keda warda henter e aña riba wela, por bisa cu esey hunto por calcula kisas un mita di e totalidad cu tur aña ta keda reparti na Aruba.

Segun Rubin Ponson, experto den explosivo, tur cos ta depende con e aña ta bay, con e poder di compra ta, kico cada persona ta interesa den dje y si nan ta bay cumpra esaki.

Di parti di DOW ta spera cu e aña aki por bay bon, debi cu si tur klapchi keda bendi, cada hende ta tira nan klapchi y no tin klapchi pa warda ta puntonan positivo pa DOW, debi cu no mester tin klapchi warda na wela. DOW ta spera cu esaki por pasa e aña aki tambe.

Segun Rubin Ponson e aña aki loke cu a tuma nota ta cu hopi pagara a keda importa y esey ta debi di e cantidad di e otro tipo di klapchinan cu a resta di aña pasa. E comerciantenan a calcula mas of menos di kico ta loke cu nan ta bay tin mester e aña aki pa asina nan haci nan pakete total na momento di bende.

Controlnan a keda haci na momento cu e containernan a yega riba wela y te na e momentonan aki no a constata nada iregular y caminda cu mester a actua pa klapchinan cu ta ilegal of no.

DOW ta spera cu durante di e controlnan den e dianan di benta na e diferente luga, cu nan tambe ta cumpli cu e reglanan. Sinembargo kisas den e controlnan ey por topa cu un situacion di tipo di klapchinan cu kisas cu no a ripara na wela, pero si constata lo tuma e medida nan nesesario riba nan.

E team manera semper a custumbra di tin y wak den un solo blok ta controla e aña aki esey no ta posibel, pero Sinembargo si e controlnan lo tuma luga individualmente y cada departamento riba nan mes mester haci nan control debidamente.

E puntonan di benta pa e aña aki ta mita di loke tabatin aña pasa.

Sinembargo playa sigur tin un cantidad mas grandi cu pariba di brug. Segun Rubin Ponson nos tur sa caba cu e aña aki ta un aña diferente, un aña cu ta bay tin su reglanan extra mara na dje, tanto pa bende y tiramento.

Ta bay tin mas regla pa comerciantenan unda cu pagaranan lo mester bay keda tira sierto oranan cu ta keda stipula y mester keda corda riba e reglanan vigente cu no ta permiti pa tin aglomeracion di hende y e comerciantenan no por propaganda e eventonan aki tampoco debi cu e mester tuma luga den gruponan chikito cu ta encera e hende nan di trabao so.

Sinembargo na cas tambe cada hende lo bay tira nan pagara y nan klapchi na nan cas, sin aglomeracion. Loke ta un realidad ta cu tur cos ta bay ta diferente e aña aki.

Rubin Ponson di DOW ta haci un apelacion na comunidad di Aruba pa ban tene consideracion ban respeta opinion di cada uno, tanto esunnan cu ta tira y esunnan cu no ta tira. Importante ta pa cumpli cu e reglanan y corda semper cu tin hendenan rond di bo cu kisas no ta gusta klapchi of cu no ta tira klapchi y nos hunto mester bin cu un balans di esaki tambe pa asina nos tur celebra e fiesta di fin di aña manera cu nos ta desea y pa nos tin un fin di aña toch contento y habri un aña mas positivo sperando cu e aña cu yega lo ta bay tin hopi prosperidad pa nos tur.

Oficialmente dia 27 di December ta momento cu e luganan ta bay cuminsa habri y e dia ey tambe por tira klapchi te cu 10 or di anochi y e ultimo dia pa tira klapchi ta dia prome di januari 2021