Ruben Luis Garcia, di descendencia Latino, na un edad hopi trempan su mama tabata kier pa e bira docente di Spaño cu Ingles. Pero segun e mes a relata, na aña 1970 el a haya e oportunidad di bay traha na Radio Kelkboom como operador, pero un dia cu e locutor a baha for di estudio el a cuminsa su caminda den radiodifusion.

Durante un entrevista special cu Bon Dia Aruba a tene cu e locutor y un di e personanan mas conoci na Aruba, Ruben Garcia, el a conta con su trayecto na radio y television tabata e momentonan mas exitoso di su bida, como tambe esun cu a haci di dje un persona mas saludabel y activo awendia.

Na aña 1971, el a ser eligi pa ta Prins y Pancho den temporada di Carnaval y asina tur cos a cuminsa. Garcia a relata cu el a haya un confiansa grandi den escenario, el a haya su mesun programa di musica pa hubentud, el a crea su mesun discoteca cu e nomber ‘Scorpio’ cual a dun’e un fama hopi grandi.

For di eynan a bin e idea ‘Scorpio Disco’, cu awe ta Nikki Beach, cu tabata un di e discotecanan mas grandi di Aruba. Na aña 1981 el a bira promotor cu a trece artistanan internacional, por ehempel UB40, Juan Luis Guerra, Wilfrido Vargas, Kool & the Gang, entre otro.

Di esaki, Garcia a conta cu e proceso a bira un poco fastioso pa sigui trece artistanan y el a bay ocupa su tempo na television y radio te dia di awe, cu combina cu promocion, ta dedica su bida diario. Asina mes el a trece dilanti cu dia 1 di juni di aña aki e ta celebra su 50 aña den mundo di farandula.

Garcia a declara cu den e mundo aki el a haya varios logro importante, por ehempel, e concierto di UB40 na aña 1994. Y loke tabata mustra imposibel pa hopi hende, segun e mes a sigura, el a logra cu ‘12.500 hende a paga pa wak e concierto ey, cu te dia di awe, 25 aña despues, te ainda ni un otro hende a logra esey. E ta un satisfaccion masha grandi mes’.

Tambe el a conta cu den dos ocasion bida a puntr’e: ‘Hey, bo kier biba’? Garcia a manifesta cu e prome biaha tabata na 2011. El a haya un tosamento hopi fuerte cu a bira pulmonia, esey a nifica cu el a keda un luna den hospital. Mita di su pulmon tabata completamente afecta cu e no por hala rosea.

Di dos ocasion, el a expresa cu tabata aña 2018. Despues di 5 dia di fiesta, trabou, celebracion di carnaval y otro factornan, un mainta el a lanta cu dolor di stoma. Pero el a come un sopi y sigui e dia normal. Dia siguiente ora e tabata na cas di un amiga el a sinti malo atrobe y a cay riba vloer.

For di e momentonan ey su bida a bolter 180 grado. E ta enfatisa cu mester a bay Colombia asina lihe cu e mes no ta corda. E tabata sinti asina malo cu su casa a conta tur loke a pasa cune. E dianan pisa despues di su yegada na Colombia, su curason a manda un señal ora el a para completamente. E tabatin 3 ader principal obstrui cu vet, loke a causa perdida di conocemento. “Den palabranan directo, ma muri un diabierna”.

Despues di un tratamento y di pasa varios dia den cuido intensivo, diamars siguiente el a lanta y canta un cantica manera ‘Alive, I feeling alive di Rusty, pasobra mi ta na bida’.

Loke tambe el a bisa di un manera divertido, tabata e momento cu el a perde su voz un luna, pa via cu el a wordo entuba pa un test cu e mester haci. Esaki a causa herida den su cuerdanan vocal. “Esey a haci mas dolor cu e curason mes, pasobra mi no por papia”, el a señala.

Ruben Garcia for di e momento ey a ripara cu mester haci un cambio den su bida. Cambia di cuminda, haci movecion, stop di bebe hopi y asina a bin su ‘estilo di bida nobo’: Come 6 biaha pa dia y cana di trinta minuut pa un ora.

“Mi ta kere e hecho di a wordo spanta cu e cos aki por bati na bo porta a pone mi enfoke riba mi”, el a manifesta.

Loke Garcia tambe a declara ta cu e kier propaganda loke el a pasa door di e situacion aki, pa asina evita otro hende pa pasa den dje. Hende mester tene na cuenta nan salud, bay haci movecion, pensa riba loke tin, pensa riba nan mes. “Abo ta e unico hende cu ta doño di bo tempo y bo mes ta dokter cu ta conoce miho kico bo ta sinti”, el a finalisa.