(NLTimes) – Rotterdam su plan di desmantela e parti meymey di e brug monumental De Hef pa asina Jeff Bezos su yate di placer nobo por pasa door di esaki a ser ricibi cu reaccionnan mixto di e Conseho di e ciudad, y localnan riba rednan social.

Mientras cu algun di nan ta señala cu desmantelacion temporal di De Hef no ta un problema mirando cu esaki ta un gran proyecto cu lo trece varios trabao nobo, otronan ta di e opinion cu Rotterdam no mester bula pa complace deseonan di un di e personanan mas rico den mundo.

Riba Facebook, mas o menos 1,900 persona a demostra interes na un evento unda cu ta haci yamado na tur residente pa bay tira webo putri riba e yate mientras cu esaki ta pasa door di De Hef. “Rotterdam a ser reconstrui for di vloer pa hendenan di Rotterdam, nos no ta bay desmantela parti di esaki pa un biyonario maniaco. No sin pleita contra esaki!” e iniciadonan a skirbi.

Compania Albasserdam Oceano ta construyendo Bezos su yate. E yate, cu e nomber Y721, ta 27 meter largo y pa motibo aki ta e di dos yate mas grandi mundialmente. E yate aki no por fit bao di De Hef, haciendo cu e plan a bira di temporalmente kita e parti meymey di e brug den e proximo temporada.

E fraccion GroenLinks na Rotterdam a pidi pa un debate di emergencia tocante e topico aki, Rijnmond a reporta. “E homber aki a gana su placa pa medio di explota su empleadonan, evadi impuesto, evadi regulacionnan y awo nos mester desmantela parti di nos bunita monumento nacional? Esaki si ta dimas,” miembro di Conseho di e ciudad, parti di e fraccion Stephan Leewis a declara. “Mi ta compronde cu den e acuerdo, e persona cu lo construi e yate y Bezos lo paga pa e costo di desmantela y reconstrui e parti aki. Mi lo kier wak e acuerdonan aki. Nos no por permiti pa ni un cent di placa publico bay den esaki.”

E partido di labor PvdA den e Conseho di e ciudad Rotterdam ta mira balor den e oportunidadnan laboral cu contractnan manera esaki ta trece na e region, pero tambe tin “opinion mixto pa cu e idea cu un biyonario Mericano por disfruta di cierto privilegionan asina den e pais,” miembro di e Conseho Denis Tak a declara na e noticiero. “E ta, claramente, un gran ehempel di orguyo Hulandes cu e tipo di yatenan aki ta construi den nos pais. E sector di construccion di barco, boto y yate a ricibi golpi fuerte den e añanan recien. Casi ningun barco ta construi aki na Hulanda mas. Tur ta bini for di Asia awo. E proyecto aki ta ofrece hopi empleo local y tambe na un nivel halto. Ademas, mi ta kere e ta algo bon cu nos por tuma placa di Bezos y pone esaki den nos region.”

Robert Simons di partido di oposicion Leefbaar Rotterdam a yama esaki un gran noticia pa constructornan di barco, pero ta furioso cu e municipalidad no a infroma e Conseho di e ciudad tocante e plannan aki di adelanta. “Mi tabata hopi sorprendi ora cu mi a tende esaki. Con e municipalidad ta tuma un decision asina strano? De Hef ta un monumento y a caba di ser renova, kiermen bo mester mantene bo man leu di esaki.” E tin e opinion cu mester a considera otro solucion. “Tin suficiente hende den e region cu ta gana nan placa den e sector maritimo. Nos mester mantene un wowo riba esaki. E ta keda un solucion hopi straño. Nan por hasta caba e construccion di e yate otro caminda.”

Riba rednan social, opinionnan tambe ta dividi. “Den mi opinion, nan por desmantela e brug aki tur aña si nos por ricibi 400 miyon proyecto den e area,” Rodney Yauandi a publica riba Twitter.

BOOS su presentador y productor Tim Hofman a comenta “Con bunita e lo a ta si e municipalidad di Rotterdam lo a simplemente bisa Bezos ‘Sorry, it doesn’t fit’ di mesun manera cu Bezos ta bisa empleadonan di su warehouse ora cu nan ta pidi un break.