Rotaract Club of Aruba conhuntamente cu Stichting Bloedbank Aruba a lansa un proyecto nobo, esta: ‘You’re somebody’s type: give a little, save a life’.
Rotaract Club of Aruba a presenta e proyecto aki na Stichting Bloedbank Aruba y a sinta hunto na mesa pa wak con por ehecuta e proyecto aki na beneficio di e organisacion y comunidad di Aruba.
Cu e proyecto aki, Rotaract Club kier a conscientisa y educa e comunidad di Aruba e importancia di ta un donante di sanger y tambe e proceso con pa bira un donante di sanger. Durante e lunanan binidero, Rotaract Club lo tin diferente actividadnan pa establece e meta aki.
Den luna di september, representantenan di Rotaract Club y Stichting Bloedbank a bishita Playa Linda Beach Resort, Universidad di Aruba y Rotary Club pa asina comparti cu nan e importancia di duna di sanger y splica e proceso con pa bira un donante di sanger.
Durante e presentacion nan aki, personanan cu ta desea di bira un donante di sanger por a inscribi nan mes via Rotaract Club na Stichting Bloedbank pa asina tambe inicia e proceso pa por bira un donante di sanger pa contribui na yuda y salba un of mas persona cu tin necesidad di sanger.
Ademas, Rotaract Club ta haci un apelacion na henter comunidad di Aruba pa forma parti di e proyecto aki. Nos por planea un sesion di informacion pa e empleadonan di bo compania of miembronan di bo organisacion pa asina hunto nos po logra hisa e cantidad di donante di sanger na Aruba.
Haciendo esaki nos por tin mas siguransa cu nos tin suficiente donante di sanger na Aruba pa henter nos poblacion conhuntamente cu Stichting Bloedbank Aruba.
Si bo persona, compania of organisacion ta desea di forma parti di e proyecto, por fabor tuma contacto libremente cu Rotaract Club of Aruba na rotaractclubaruba@gmail.com, via nos pagina di Facebook of Instagram.Tambe por aserca un miembro di Rotaract Club pa mas informacion con pa bira un donante di sanger pa cu e proyecto aki.
Duna un regalo di bida, bira un donante di sanger!
