Diamars ultimo, Bureau City Inspector a informa cu den dianan di Carnaval nan ta haciendo e trabounan necesario pa controla e parti di limpieza, como tambe no haci uso di palet riba ruta y cortamento di mata.
Robby Rosel, PR di Bureau City Inspector a informa tocante diasabra ultimo cu tabatin parada di Carnaval di mucha na Noord. El a splica cu e mensahe di no usa palet ta yegando, pero cu nan a haya dos luga cu tabata haci uso di esaki. Un di nan tabata trata di un barco cu a arma riba caminda di Boegoeroei, y tambe a haya stoelnan di palet.
Asina mes, Rossel a informa cu hende a haci uso di saconan di sushi cu BCI a reparti pa e publico presente di e parada y Serlimar a pasa a recoge nan hunto cu tur e desperdicio.
Rossel tambe a señala cu nan a haya e caso contrario na parada di muchanan di San Nicolas, na unda nan a haya hopi sushedad y desperdicio, loke a causa un retraso di trabou di Serlimar y BCI.
Tocante e proximo parada cu el a anuncia cu ta Lighting Parade na Playa diasabra awor, Rossel a manifesta cu nan a mira den otro ocasion cu tin trailer riba veld cu ta haci uso di acera y cu esey no ta permiti, pa motibo cu ta riba caminda publico na unda e hende ta cana.
Tambe el a menciona cu añanan pasa riba caminda principal di playa, banda di lama tabatin hendenan cu kavel cu ta tira desperdicio den lama, manera bleki di refresco of boter di awa. Tocante esaki Rossel a bisa cu ta controla esey e aña aki y nan ta kere cu ta miho pa usa e saco di plastic y asina no contribui cu mas desperdicio, cu ta perhudicial pa lama.
Manera a keda conoci pa via di reparticion di saconan BCI kier colabora cu comunidad y asina hende por bira mas consciente, haci bon uso di saco pa desperdicio durante e paradanan di Carnaval pa mantene Aruba limpi.
