Empresa petrolero propiedad di gobierno Ruso, Rosneft no lo duna mas credito na e empresa estatal petrolero di Venezuela, PDVSA. E situacion aki a surgi pa falta di pago di banda di PDVSA. E empresa petrolero Ruso a duna na april ultimo un pago anticipa di USD $1.015 miyon dollar na PDVSA, a base di nan acuerdo di compra di petroleo entre e dos companianan. Sin embargo e situacion ey no lo sucede mas: “Empresa productor di gas y petroleo Rosneft a duna USD $6.000 miyon como pago anticipa na PDVSA y awor no tin plan di duna mas pago adelanta  na e empresa di petroleo Venezolano,” Pavael Fyodorov, prome vice-presidente di Rosneft  a informa.

E decision cu a ser tuma na luna di maart, pa un tribunal di isla St. Maarten ta bisa: ”Rosneft tin reclamo di factura cu PDVSA no a paga. E reclamo ta relaciona cu e  pago di huur di nan barconan.” Aunke e petroleo cu tabata den e barco a ser bendi caba pa e empresa di noruega Statoil, e carga a wordo hiba riba un barco cu tabata nabega cu documento di PDVSA.

Segun Reuters, PDVSA tin un acumulacion di debe alrededor di mundo, cu ta varia desde reparacion di varios lugar caminda nan ta drecha barco na Portugal y factura pa construccion di barco cu ainda no ta cla  na Iran y  Brasil, te un cargamento di petroleo cu a ser confisca na St. Eustatius. Esaki no ta prome biaha cu PDVSA ta afecta pa motibo di nan debe cu nan suppliernan; na luna di september un barco propiedad di PDVSA a keda reteni na Curaçao, cu un orden hudicial, cu a ser solicita pa compañia Core Laboratories, pa motibo di hopi debe di banda di PDVSA.

Sin embargo un siman pasa Rosneft a sigura cu nan lo aumenta e nivel di cooperacion cu Venezuela

Rosneft, empresa di petroleo di gobierno di Rusia a bisa cu lo continua cu nan trabao di intercambio cu Venezuela. Igor Sechin, hefe di Rosneft a bisa cu e empresa petrolero lo sigui traha cu Venezuela y lo aumenta e nivel di cooperacion cu e pais Suramericano aki. Sechin a bisa cu el a ripiti hopi biaha,  cu nan (empresa Rosneft) no lo stop di traha nunca cu Venezuela.

“Mi a bisa na varios biaha, nunca nos lo bay, ningun hende por saca nos afo, nos lo traha cu Venezuela y nos lo hisa e nivel di cooperacion tambe,” el a bisa. E director di e empresa Ruso a manifesta cu Venezuela tin e mayor reserva di hidrocarburo na mundo, pa tal motibo cualkier compania di petroleo y gas lo aspira pa traha na Venezuela semper”. El a bisa cu Rosneft tin proyecto pa extrae petroleo di Venezuela y cu ta produci 9 miyon tonelada pa aña. Presidente Nicolas Maduro a informa siman cu a pasa cu despues di luna di juli 2017, Venezuela lo firma acuerdo nobo den materia di gas y petroleo cu Rusia.

“Pa di dos semester lo firma documento importante pa amplia e inversion di tur dos pais, entre e empresa Ruso di petroleo y gas, y nos PDVSA,” Nicolas Maduro a informa.