Rosetna Martinus ta un Transformational and Wellness Coach cu ta enfoca no solamente ariba un curpa saludabel, pero tambe un mente y alma saludabel y contento. E ta conta den un entrevista cu Bon Dia Aruba kico e meta di Heartly Fitness Coaching ta, con e idea pa Heartly Fitness Coaching a nace y e ta duna su conseho pa un bida mas saludabel.

Rosetna ta conta cu Heartly Fitness Coaching ta un comunidad di hendenan cu tin e mesun pensamento di kier traha riba nan curpa y nan mente, pero cu ta enfatisa e conexion cu nan alma tambe. Heartly Fitness Coaching ta trece persona hunto, primordialmente hende muhe, aunke nan ta habri pa hende homber tambe, cu kier haci un camboi den nan bida den e parti di nan salud y movencion.

“E parti hopi importante ta e parti interno tambe haciendo nan mes contento, traha riba e amor propio pa asina bo por logra mas den bo bida, pero tambe inspira otro nan. Esey ta e meta principal,” el a indica.

Banda di e sessionnan cu tin pa adulto, nan ta enfoca tambe riba mucha, e motto di Heartly Fitness Coaching ta ‘move mas, stress menos’ y esaki ta conta a mucha tambe. “Mas chikito nos cuminsa ta miho pasobra nan tin e chance pa haci esaki tambe como un rutina,” Rosetna a remarca.

Fuera di yuda e mayornan pa nan ta saludabel, pa nan tin energia pa por haci actividad cu nan yiunan, nan ta duna oportunidad na e muchanan participa activamente y esaki den forma di dance fit.

Rosetna a splica cu nan tin programa di dance fit y yoga pa mcuha y cu esaki nan ta yuda nan keda den movecion y na mesun momento e ta inspira nan creatividad y ta haci tambe cu nan ta mas contento.

“Nos ta promove esey y dimes tambe nos tin programa caminda e muchanan tambe por participa pa asina por yega cualkier meta cu nan tin sea pa motibo di salud of pa haci mas actividad y nos ta guia den e parti di nutricion tambe si tin mester,” el a agrega.

E programa di kids dance fit y yoga ta pa muchanan for di 5 aña te cu 12 aña y despues di , di esey, muchanan di 12 pa 17 aña por participa den e lesnan di adulto. E kids dance fit y yoga ta enfoca ariba e muchanan un tiki mas chikito, pesey nan ta bin y participa den un les cu ta di mucha so caminda adulto no ta participa.

Rosetna ta conta cu Heartly Fitness Coaching tabata un soño di dje for di hopi tempo caba. El a sigui conta cu su passion ta baile. For di chikito, for di dos aña e ta move, for di chikito caba e ta baila y haci su mesun choreografianan y esaki a inspire pa crea e comunidad di Heartly Fitness Coaching.

“Semper mi a baila, mi a baila den grupo di baile, durante mi estudio semper mi a haci banda di mi estudio cualkier tayer cu tin di haber cu baile y for di mi 15 aña mi a cuminsa den fitness. For di eynan semper e tabata algo hopi importante den mi bida,” Rosetna a subraya.

Algo cu a dune e proposito pa cuminsa tambe ta ora el a experiencia su oma su problemanan di salud pa motibo di pasa hopi tempo di su bida sinta sin por move. “El a experiencia tur e diferente malesanan cu bo ta haya door di sinta hopi. Door di esey mi a haya mas gana di yuda mas tanto hende, mas tanto mucha pa no laga e parti di movecion un banda,”, el a agrega.

Cu Heartly Fitness Coaching Rosetna por provee esaki pa no solamente haci movecion pa baha peso, pero mas bien pa e parti di movecion pa hende por biba mas largo, ta mas activo, pa no depende di niun otro hende y tin un miho calidad di bida.

Por ultimo Rosetna ta brinda su conseho pa tur persona cu tin deseo di cuminsa cu un bida mas saludabel. “Ta sumamente importante pa cumins atraha riba prevencion. Si acaso no tin e manera di por hempel bay un gym of cuminsa cu un plan especifico, cuminsa simple djis cana rond na cas, pone musica, cana canto di lama, bay lama mes bay landa y haci algo cu bo ta gusta cu ta parti di movecion. Cuminsa eynan pa esey inspirabo pa bo por cuminsa enofca mas intensamente den e parti di movecion.”

El a enfatiza e hecho cu una bes cu un persona cuminsa haci movecion, e ta bay yuda y ademas, el a agrega, cu tin prueba cu ta indica cu movecion ta medicina. “Cuminsa simpel y ora bo curpa custuma bo ta cuminsa bira mas intensivo. Haciele no solamente pa baha peso, haciele pa bo tin un miho calidad di bida den futuro y pa bo stress menos.”

“Hopi biaha e motibo pakico nos ta yega na tur e malesanan ey ta pasobra nos mes ta pone esaki pasa internamente. Pesey na Heartly Fitness Coaching nos ta enfoca no solamente riba e curpa y mente, pero tambe e parti emocional pa asina logra ta mas saludabel,” Rosetna a finalisa.