Tin potretnan y discusion andando pa basta dia caba pa locual ta caso di destruccion di locual por ta Groen Gebied na Bubali Plas. E area ta basta grandi y ta specula ainda ta kico exactamente ta bay pasa akinan y pakico a coba den locual ta considera un area di naturalesa cu eigenlijk mester keda protegi.
Bubali Bird Sanctuary ta un di e cuater areanan di Parahanan di mas importante na Aruba. BirdLife International ta un organisacion cu un iniciativa global pa protehe e parahanan rond di mundo. Un di nan compañeronan na America ta e Audubon Society. BirdLife International ta e asociacion cu tey pa yuda conserva naturalesa y nan ta esun di mas grandi na mundo cu 119 BirdLife Partners rond di mundo y mas cu 13 miyon di miembro.
Cualkier hotel cu ta acomplice den e destruccion di un area importante di parahanan manera e Bubali Bird Sanctuary, mester responde riba un nivel internacional cu tambe por trece consecuencianan pa locual ta reputacion internacional y dus maneho di negociacion internacional ,segun Greg Peterson di Aruba Birdlife Conservation ta splica riba su pagina di Facebook.
Peterson ta agrega cu a duna permiso pa destrui e area aki den aña 2009.Locual ta haci e destruccion aki uno mas straño ta cu tur 21 miembro di parlamento a yega di vota pa esaki keda un area protegi y pone bao di e park.
Peterson ta buscando caminda legal cu su fundacion pa mira ken ta responsabel y kico por wordo haci pa para e desaroyo aki. Si bo mira riba e Ruimtelijk Ontwikkelingsplan (ROP) di 2009, tin cierto areanan cu ta marca berde rond di Bubali pa indica kico ta cay bao di Groen Gebied, pero no ta duidelijk ainda si Bubali Plas ta cay bao di e area aki.
Bon Dia Aruba ainda ta pendiente pa ricibi mas informacion for di Greg Peterson y tambe DIP pa asina aclara hopi di e preguntanan cu e caso aki ta lagando habri manera tambe ken ta e doño di e tereno, kende a duna permiso pa haci esaki anto pa ki motibo.
