Tocante e caso di rosamento na Bubali Plas, keto bay ainda tin mas pregunta cu tin contesta. Bon Dia Aruba a sinta cu Greg Peterson, presidente di e fundacion Aruba Birdlife Conservation, kende a splica Bon Dia cu siman pasa un persona a pone un potret riba Facebook y Peterson mester a bay confirma esaki personalmente na unda e la mira con grandi e daño eigenlijk ta.
”Actualmente no tin ningun informacion autentico cu ta mustra di ken e tereno ta, ken a duna aprobacion pa haci esaki of pa ki motibo tin rosamento tumando luga na Bubali Plas”, Peterson a bisa.
E abogado di Aruba Birdlife Conservation a bay DOW pa puntra na e balie publico unda kende cu ta por bin busca informacion relaciona cu tereno y a resulta cu DOW no por a ofrece ningun informacion pa motibo cu nan no tabata tin nada segun Peterson. Esaki ta duna indicacion cu e tereno no a wordo midi ainda, ni tampoco numera a lo menos asina leu di no ta presente den e sistema di DOW. Aruba Birdlife Conservation a wordo informa e ora ey cu mas probablemente e proceso ainda ta bao man di DIP.
E importancia di Bubali Plas
Bubali Plas a ser reconoci pa Birdlife International kende ta e asociacion di mas grandi na mundo
pa locual ta trata conservacion di naturalesa. E asociacion aki tin un programa caminda nan ta clasifica cierto areanan importante bao di ‘Important Bird Areas’ (IBA) y a wordo declara cu tin 4 di esakinan na Aruba. E areanan aki ta Bubali Plas, Tiera Del Sol Saliña, Reef Islands Oranjestad & San Nicolas Bay Area y sin laga afo e Ramzaar Area Spaans Lagoen. Na 2012 Aruba Birdlife Conservation a manda parlamento un peticion pa declara 16 areanan nobo manera Teritorio di Naturalesa ( ‘Natuur Gebied’ )y pa nan wordo agrega na e Parke Nacional. E motibo pakico a haci esaki ta pasobra e Parke ta consisti di hopi cos pero e no ta mucho bon riba e parti di Fauna pa motibo cu e ta situa riba parti pa Noord.
”Parke Nacional tin atributonan hopi fabuloso geologicamente manera e cuebanan y diferente sorto di Flora cu ta hopi special, pero ora ta trata na Fauna y e concepto di nos parhanan, mester tene na cuenta cu protegiendo esaki no ta cuminsa ni caba na Parke Nacional so” , Greg Peterson ta conta Bon Dia. Na Aruba tin 252 diferente especie di parhanan registra pa locual 90% di e parhanan aki ta biba parti pa zuid of riba diferente parti di e isla. Riba 6 di februari di aña 2013, e fraccion di AVP a trece esaki pa dilanti den un Reunion Publico caminda tur 21 miembro di parlamento a vota pa declara e 16 areanan nobo bao di Zona di Naturalesa. Peterson ta splica Bon Dia cu ora cu nan a bay parlamento nan a pidi pa henter e area di Bubali cay bao Zona di Naturalesa y no djis un pida y a yega na un acuerdo riba esaki.
Siguiente pasonan pa wordo tuma
Den e statuto di e organisacion Aruba Birdlife Conservation ta para cu nan tin permiso pa bringa pa conservacion di naturalesa y protege cierto areanan. E proceso legal a inicia y ta bay sigui pa dilanti pa purba di para e desaroyo aki mas pronto cu ta posibel segun Peterson y confirma ta ken ta tras di e proyecto aki anto pakico.
”Hopi biaha e desaroyonan aki ta manera un cancer, nan ta cuminsa un caminda y despues ta sigui crece bay afecta mas luganan. Esaki nos gewoon no por permiti” .
Peterson ta sigui splica cu nan kier sikiera sigura di protege e 16 areanan aki y pone nan oficialmente bao di e Parke Nacional. Peterson ta bisa cu no kier specula pero tin informacion cu algun tipo di hotel ta bay wordo construi eynan pero no tin informacion concreto pa confirma esaki.
Segun Peterson, Aruba realmente no mester mas hotel pa motibo cu e modelo di construi hotel na Aruba ta rekeri importacion enorme di labor pa por cumpli cu esaki, sin laga afo con hopi mas nos lo ta sofocando e isla cu un crecemento innecesario di nos populacion. Di parti Aruba Birdlife Conservation, Greg Peterson ta manda un apelacion na gobierno di Aruba y miembronan di parlamento pa por fabor para firme pa e 16 areanan aki haya e proteccion cu nan merece no solamente riba papel so, pero pa pone esaki den practica.
