Naturalmente mayoria di nos tin sintimento humano cu ta haci cu nos lo kier yuda esunnan den necesidad cu ta procedente di otro paisnan. Pero prome cu bo bay yuda bo mester wak si e infrastructura di bo pais por carga mas emigracion. Lamentablemente niun gobierno no a paga atencion riba esaki y a keda permiti emigracion descontrola y esey a haci cu awendia, banda di e destruccion di naturaleza pa traha mas vivienda, e capacidad di e hospital keda mucho chikito pa por cumpli cu tur e necesidadnan di e poblacion.

Si tin algo cu e crisis a mustra ta kico nos secuencia lamentabel decisionnan asina por tin mirando cu awor hendenan pa falta di tratamento medico a fayece na cas y yen di caso di negligencia medico. E pasado sinembargo ta pa siña foy dje so. Cual ta crucial awor ta pa evita cu e caso postivonan sigui escala y mas bida bay perdi. Den nos opinion awor y a tin demasiado caso positivo pa sinta controla si tur esunnan cu mester ta isola y den cuarentena ta keda den isolacion of den cuarentena. Segun cifra di departamento di salubridad publico (DESPA) tin ongeveer 3000 caso positivo cabay si nos sali foi punta di bista cu ta biba 4 hende cu a test positivo na cada cas tin mas of menos 750 cas papa sa pa controla, cual no por wordo controla 24 ora tampoco. Segun e cifra di DESPA tin un promedio di 100 caso nobo positivo, esey lo kiermen cu si nos poblacion ta consisti di 150 mil hende cu e grado di infeccion ki sigui cu mas a menos 50 mil hende (1/3 parti) lo contagia cu COVID den 1,4 aña di cual250 (0,5%) lo fayece na COVID so sin conta tur esunnan cu lo fayece pa falta di atencion medico. Banda di perdida di bidanan precioso y gasto pa hospital esaki lo tin consecuencia financiero pa entiero pa hopi famia cu ya caba. Cera frontera tampoco lo ta un opcion ya cu lo no por permiti cu e economia wordo afecta mas y mirando e hecho cu no lo yuda e grado di contagio baha ya cu e mayoria di caso positivo ta bou di e localnan. Pa evita perdida di bidanan precioso y gasto addicional nos ta kere cu lo ta mas efectivo pa gobierno a base di e Ley di Calamidad pidi e sector hotelero pone 1 of mas hotel disponibel y pone esunnan cu a test positivo sin simptoma of simptoma leve aden y pone 1 security na porta central unda cu e famianan un manera orden a por laga cuminda pa cada familiar pa 15 dia den e lobby.

Den nos opinion e sector hotelero tambe tin cu yuda salba bida den e crisis ki. Es mas nos ta di opinion cu despues cu e comunidad Arubano a permiti e sector ki pa decada pa haci negoshi hopi rentabel awor lo cumpli cu un obligacion moral pa e tambe duna algo bek na e comunidad di Aruba. E balor cucu Mark Ghoulston a papia di dje ora el a bisa cu rikesa ta cual bo ta coy foi mundo pero cu e balor ta cual bo ta duna bek. Ademas e sector aki lo beneficia si e grado di contagio baha pasobra esaki lo haci Aruba mas atractivo pa turista atrobe. Mescos cu ya a fumiga e edificionan den e otro sectornan lo por fumiga hotelnan tambe pues esey no lo mester ta un problema tampoco.

Nos tambe ta tata, mama y ruman y mas cu claro nos tambe a keda den shock y tristeza ora a tuma nota di cual a sucede. Pues na e familiarnan di tur esunnan cu a fayece pa falta di atencion medico nos kier a extende nos mas sincero y profundo condolencia. Cu Dios duna boso hopi forsa.