ROPv ta drenta na vigor awe: proyectonan vertical ta cuadra cu e vision di sostenibilidad; Casnan di Caribbean Town ta dirigi na clientenan di DIP en busca di cas

Awe e regulacionnan di e Plan di Ordenanza Espacial, e ROPv ta drenta na vigor y segun dr. Haime Croes, Director di DIP, e plan pa traha casnan vertical conhunto cu sector priva ta cuadra cu desaroyo duradero.

Manera ta conoci, DIP a anuncia e siman aki cu Caribbean Town Villas and Apartments a cera un convenio cu Pais Aruba, pa traha casnan vertical, cu ta rekeri menos espacio.

E casnan di Caribbean Town Villas and Apartments lo ta entre 170 y 300 mil florin, Croes a bisa Bon Dia Aruba. E pregunta a bin despues cu DIP a publica e acto di firmamento di traspaso di erfpacht pa e compania, cu a cera un acuerdo cu Pais Aruba pa traha cas pa comunidad.

Segun e relato di prensa, locual ta particular den e situacion aki ta cu proyecto di vivienda lo ta vertical, teniendo na cuenta desaroyo sostenibel den balans, ademas di tuma paso pa proteha medio ambiente y naturalesa.

Director di DIP a bisa cu vision di Gobierno ta pa yega na un desaroyo duradero y a base di esaki a planifica Aruba, poniendo tereno disponible/destina pa naturalesa y medio ambiente.

“Lo tin un grupo chikito di e casnan cu ta costa mas di 300 mil florin,” Croes a sigui splica. “E idea ta pa na October presenta e prijsnan definitivo y nos ta spera cu nan lo ta manera cu a calcula.” E intencion ta cu por cumpra e casnan of drenta un areglo di ‘huurkoop.’ “E ta dirigi na e clase medio di Aruba. Nos a dirigi e casnan aki basa riba e categoria di cliente cu ta haci peticion na DIP y ta casnan pagabel manera e grupo di DIP a mustra.”

Pa por bin na remarca pa un di e casnan aki, mester inscribi na DIP. Lo usa e mesun criteria di maneho di 2018 cu a keda vigente. “Entre otro, si bo tin un cas caba bo no ta bin na remarca. Awor nos ta bayendo pa e lista di espera di 2013 te 2018 cu ta esnan prome yama pa haya un cas si nan ta interesa, si nan ta cumpli cu e rekisitonan.”

Dr. Croes a agrega cu awor e intencion di DIP ta pa pone mas tereno disponible pa e desaroyador di e proyecto. E intencion ta pa traha mas di e tipo di proyecto asina na Eagle y tambe San Nicolas. Companianan interesa pa participa na proyectonan asina tambe por bin na remarca pa e opcion. “Nan por pasa libremente na DIP, entrega nan proposicion y mira si nan por bin na remarca. Manera nos sa, e ROPv ta stimula construccion di cas den areanan urbano, manera San Nicolas y Oranjestad, pa asina preveni destruccion di naturalesa,” Dr. Croes a agrega.