Na opinion di Rebecca Roos, productora y directora di films Rubiano, na Aruba no tin respet pa personanan cu ta labora den sector y industria creativo. Ainda ta prevalece e pensamento cu trabounan relaciona cu creatividad ta un ‘hobby’.

Recientemente Roos a duna un tayer na Escuela Internacional de Cine y Television na Cuba y tambe un tayer pa hobennan tocante traha films aki na Aruba. Pues den e cuadro aki a reflexiona hunto cu e artista riba e industria aki y con den su totalidad e ta mira cu esaki ta na Aruba.

Roos ta haya cu ta dificil pa bisa con e industria ta bayendo na Aruba pa motibo cu tin ‘hopi talento’ ora ta papia di hende cu por filma. E ta wak cu tin hende ta compronde nan camara, y tin un bon storia pa conta, sinembargo no tin un comprension general di e structura narativo pa conta un storia audiovisual.

“Si bo puntra un hende pa nan difini e storia di un proyecto cu nan lo tin, e lo keda na contestando cu e storia tin un cumisamento y un final.”

Roos no por descarta cu medionan digital y social ta influencia e industria di films masha hopi mes, mirando cu nos capacidad pa atencion y enfoke ta birando cada dia menos. E tin su puntonan positivo tambe: Desde cu Netflix y mira pelicula y show online a bira mas popular tin mas sensibilidad pa estetica, pues mas hende ta consciente y kier wak pelicula of otro medionan audiovisual di bon calidad.

‘Nos lo por tin un industria creativo masha potente na Aruba’
Sinembargo e acceso na trabounan den e industria aki ainda ta limita. Un di e motibonan ta cu ekipo no ta barata: Camara, ekipo di audio, ‘tur esey ta costa placa’. Pero Roos tin speransa cu e industria creativo, specificamente den filmmaking, por bira algo ‘masha potente’. “Si nos cuminsa apoya mas y stimula hende pa bay tuma curso afo, pa medio di academia of via demas fondonan cu por aplica pe, nos lo tin un industria creativo masha potente na Aruba.”

Pero ainda tin un caminda largo pa yega aya. Algo cu Roos ta imagina pa futuro ta pa Aruba tambe ta orguyoso di su artistanan y trahado creativo, por medio di considera nan trabou un ofisihi di profesional na mesun nivel cu ta honra docente, farmaceutico y dokter. “Un persona cu ta studia arte ta mescos cu un accountant cu ta specialisa den un ramo, sinembargo e respet pa trabou den arte no t’ey.”

‘Mescos un accountant artista ta haci uzo di talento, creatividad y pasion’
Pa un trabou manera accountant tambe mester tin talento, creatividad y pasion. Pero e si ta wordo paga pa su talento, maske tin fondonan na Aruba cu ta financia y cofinancia proyectonan, e persona creativo no ta haya un salario cu mayoria otro trabou si ta ofrece. Y aki ta unda e cultura di pidi personanan cu ta traha den sector creativo pa nan haci algo gratis of pa haya atencion ta cuminsa. Segun Roos esaki ta pa via cu no tin e mesun respet pa e ofisihi den sector creativo compara cu otro trabou.

Pues mirando esaki, a puntra Roos dicon el a dicidi bin bek Aruba toch mirando esaki. Roos a conta cu el a wordo ofreci un trabou, pero pa un cierto periodo, sinembargo el a ripara cu no tabata tin mucho historia den forma di video. “Mi pasion tabata pelicula ficticio, pero mi a wak cu no tin documentario anto mester a documenta nos historia.”

Awendia mayoria di video tin 20 aña y ainda ta ripiti algun, cu reaccion cu lo mester bin cu mas. El a dirigi mayoria. Su idea tabata pa lanta un industria na Aruba, actual tin mas hende pa por tuma parti di proyecto pero ta necesario haya fondo pa por paga esnan cu ta haciendo nan trabou.

Sinembargo, maske cu Roos ta haya Aruba un luga masha yen di inspiracion pa traha ficcion of pelicula tocante bida real, tin necesidad pa hende ta mas critico den manera constructivo ora ta trata di arte of creatividad. Ta importante pa cada persona por defende e idea cu el a crea, sea ta skirbi presenta den cualkier manera. Pa e por cuestiona y splica dicon el a scoge esey.