Ronny Irausquin director di DPL : “Vacatura tin hopi, trabou tin”

Manera a ser informa pa algun dianan pasa door di prome minister Evelyn Wever-Croes, FASE ta yegando na su final na unda cu preocupacion a surgi den esunnan cu te ainda no tin trabou.

Asina prome minister a comenta cu un di e preocupacion di CAft ta FASE, un ayudo cu a keda introduci na comienso di pandemia pa asina yuda personanan cu a keda sin trabou debi na Covid-19, durante un reciente bishita di CAft na Aruba a logra papia cu diferente persona cu ta haya FASE mientras cu otronan ta haci abuso como por ehemplo algun taxistanan, segun nan a bisa.

Durante un entrevista di Sr Ronny Irausquin director di Departamento di Progreso Laboral (DPL) el a trece dilanti informacion riba varios vacatura cu nan tin na e momentonan aki y cu tur diasabra nan ta publica esey riba corant. Actualmente nan ta bezig cu un di e hotelnan mas grandi na Aruba pa asina wak con pa yuda nan pa por haya hende pa traha na e hotel, “nos a haya un peticion di e hotel cu nan ta bay tin mester aproximadamente 100 hende pa traha den diferente funcion” Irausquin a señala. Esaki ta importante pa personanan cu ta cobrando FASE manera Irausquin a afirma pa motibo cu nan por registra via nan website www.dpl.aw of tambe por acerca na nan oficina personalmente.

Ademas di oficina cu nan tin na area di Playa, nan tin un adicional den area di San Nicolas na unda cu personanan cu kier inscribi of ta busca trabou por haci uzo di dje. “Vacatura tin hopi, trabou tin” na unda cu tambe Irausquin a señala cu nan ta hayando vacatura den e parti mas grandi cu ta Horeca cu ta e parti di limpiesa, housekeeping, room attendant, tambe nan ta haya otro funcionnan como den e parti administrativo pero esey no ta hopi, lo cual nan ta ofrece ta lo cual nan ta hayando aworaki.

“Na e momentonan aki ta importante pa bo haya un trabou, mi sa cu e ta dificil pa bo bay haci trabou di limpiesa pero mirando e situacion cu nos ta aden ta importante pa tuma un trabou y por ta aki un par di aña por haci cierto cambionan”, el a sigura.

Ora persona kier inscribi y registra pa haya un trabou via DPL mester yena un formulario den e website y indica den e tres opcion kico ta e tipo di trabou cu e persona ta busca, ora e vacatura ta drenta cerca DPL nan ta wak kico ta e prome escogencia cu e persona a pone, si na e momento ey no tin suficiente vacatura pa e parti ey nan ta bay wak kico ta e otro dos opcion cu e persona a scoge pa haya un trabou.

Si ta existi e vacatura, e ora ey e persona ta wordo yama segun loke e proceso di e departamento aki ta indica, Irausquin a enfatisa.

Irausquin a bisa tambe cu awor e proceso ta mas facil pa motibo cu nan a cuminsa atende publico back despues cu pa via di pandemia Covid-19 nan tabata traha citanan via online so y si un persona a registra pero no a haya un yamada di DPL e persona por acerca na nan oficina pa puntra con e proceso cu su solicitud ta bayendo y tambe por mira tur e vacatura cu nan tin disponibel.

Tin cierto doñonan di companianan cu tin mester di personal pero nan no ta haya esun mas adecua pa eherce e funcion na unda cu Irausquin a sigura cu pa dunadonan di trabou ta importante pa nan tambe cuminsa guia un hende pa e funcionnan cu nan ta tuma, el a pone como por ehemplo, cu pa algun biaha dunado di trabou ta acerca DPL pa entrega un vacatura y ta bisa cu e trahado mester tin un of dos aña di experiencia. “Nos tin hopi muchanan hoben cu ta caba scol y por ta di biaha nan no tin asina hopi experiencia den e funcion, pero mi ta kere cu ta importante pa dunado di trabou cuminsa siña e personanan aki con pa haci e funcion y e trabou, e ta un responsabilidad tambe pa e doño di trabou cuminsa haci esey”, Irausquin a expresa. Departamento di Progreso Laboral ta canando di manera normal na e momentonan aki despues cu pa via di pandemia a topa cu cierto contratiempo unda cu peticionnan ta drenta y nan ta duna contesta “te aworaki e ta bayendo bon”, el a bisa.

Dunado di trabou ta responsabel si e ta scoge pa tin un tramitado segun loke Irausquin a señala y cu nan ta disponibel pa yuda dunado di trabou pa guia nan con pa yena un formulario y con pa cana e proceso cu no ta mucho dificil, el a finalisa.

Ademas, teniendo cuenta cu FASE ta den su fase final, Gobierno a presenta e proyecto ‘Aruba kier traha’ pa asina a traves di e proyecto aki yuda esunnan cu ainda no a yega na un trabou, pronto nan lo haya un trabou. Nan a menciona cu e proyecto aki ta encera entre otro cursonan y guia pa yuda tur ciudadano haya trabou.

“Mientras cu ta trahando riba diversificacion di nos economia cu mas desaroyo pa crea mas cupo di trabou, nos mester pa tur hende realisa cu FASE ta drentando su fase final. Ainda ta deliberando cu Hulanda riba e fecha exacto pero no ta dura mucho mas. Awor aki nos tin mester di apoyo di tur hende cu ta den FASE, di tur comerciante cu ta depende di loonsubsidie. Awo ta e momento pa realmente duna bek. Gobierno a yuda tur e tempo aki. Pero Gobierno no por keda mantene artificialmente esunnan cu a wordo hopi mal afecta pa motibo di Covid. Gobierno lo sigui yuda a traves di esunnan cu kier traha y pa tur yega na un trabou mas pronto posibel”, Prome Minister Evelyn Wever-Croes a enfatisa.