Ayera directora di Oficina di Turismo Aruba (ATA), Ronella Tjin Asjoe-Croes a tene su prome conferencia oficial di prensa pa loke ta trata 2016. Durante un conferencia y desayuno cu a tuma luga na Rietveld Academie, e alto ehecutivo di ATA a duna un panorama general di e plannan di desaroyo pa cu turismo pa 2016. Den linea general el a laga sa cu ATA lo enfoca riba calidad y desaroyo di nos producto turistico.
Riba e posibilidad cu esaki lo ta e delaster aña cu sra. Tjin Asjoe-Croes lo sigui como directora di ATA pa atende algun reto personal, el a nenga esaki rotundamente. El a declara na Bon Dia Aruba cu e no tin pensa di renuncia y cu nunca el a yega di tende un rumor asina.
Panorama general
Pa loke ta trata crecemento di nos turismo, ya caba el a pronostica cu e aña aki lo ta uno ambicioso y “positivo’. Aunke e ta reconoce cu mundo turistico den nos region Caribense lo cay keto bay, pues nos region lo conoce un crecemento modera compara cu otro destinacion Asiatico y Europeo. Un anuncio masha importante cu el a haci tin di haber cu na luna di september den cuadro di e congreso anual di ATA, lo tin presencia di director di Organisacion Mundial di Turismo na Aruba.
ATA lo sigui inverti den nos producto turistico. Un 76% di nan presupuesto lo wordo inverti den mercadeo y den nos producto Aruba, asina Tjin Asjoe-Croes a bisa. E mercado di Venezuela lo keda uno instabil y dificil, ya cu pronto lo bin mas regulacion y restriccion riba cupo of acceso di dollar pa e turista Venezolano, segun maneho monetario di e gobierno di e pais bisiña. Cuba tampoco no a wordo exclui riba e puntonan cu Tjin Asjoe-Croes a trece dilanti di prensa. El a indica cu e pais aki lo bira un competencia fuerte den nos region y muy specialmente pa e islanan y destinacion turistico cu ta mas cerca di dje, nan lo conoce mas fuerte e impacto aki.
