CEO di Aruba Tourism Authority (ATA) Sra. Ronella Tjin Asjoe- Croes durante di rueda di prensa di Gobierno di Aruba na comienso di siman, a anuncia e cambionan pa loke ta trata e maneho pa bishitantenan di Merca. Esaki segun Sra. Tjin-Asjoe-Croes ta un otro paso significante y importante pa stimula ingreso di turista y impulsa nos economia.

Te cu aworaki y desde cu a habri pa Merca, a haci un distincion entre estadonan considera como “hot zones”, y otronan cu no ta “hot zones”. Den un “hot zone” tin mas caso y mas medida necesario prome cu un turista biaha bin Aruba, esakinan ta mara na analisis nan haci. Ta importante pa menciona cu entrante prome di november lo no bay tin e distincion di “hot zone” aki mas y lo tin un maneho diferente pa esunnan cu kier biaha bin Aruba.

Locual ta proyecta door di e cambio aki ta, 7000 bishitante pa luna di november y tambe pa december. E cifra por ta diferente pero esaki ta e analisis haci na ATA pa midi e impacto di e cambio aki. Mester tene na cuenta si cu e maneho di test pa Aruba ta keda uno stringente cu su motibonan.

Recapitulacion di pasonan anuncia durante ultimo dos simannan pa stimula turismo y economia:

Reduccion di tarifa di seguro pa bishitantenan; enbes cu cada persona ta paga70 dollar pa siman pa estadia awor ta paga 30 dollar pa persona sin importa largura di estadia. Manteniendo e mesun componentenan di e seguro.

Reapertura mercado LATAM, Mexico, Republica Dominicana y Haiti entrante 1 di december 2020

Eliminacion di “hot zones” na Merca entrante 1 di november 2020

Pronto lo anuncia colaboracion cu aerolineanan (mas grandi) di Merca caminda nan tambe lo bay ofrece como servicio na nan cliente, e habilidad di por regla e test cu ta rekeri pa Aruba conforme nos rekisitonan, como un servicio adicional na e cliente. Esaki ta yuda Aruba, pasobra e hecho cu mester haci e test dentro di tres dia y entrega esaki dentro di tres dia prome cu biahe ta keda e drempel mas grandi te ainda. Pues cu asistencia di aerolineanan e lo ta un adelanto principalmente pa Merca.

“Pa conclui, E unico cos cu falta awo ta bon comportacion di cada ciudadano, ban atene na reglanan y ban duna nos miho servicio na esunnan cu a dicidi di haci un biahe den d temponan dificil cu nos ta aden. Esey ta e rekisitonan clave pa por tin un temporada halto exitoso.

Tur loke a anuncia ta pasonan adicional teniendo na cuenta cu tin responsabilidad pa cu salud di un y tur. Pero tambe e balansa cu por subi un tiki mas e enfoke riba nos bienestar economico y bienestar di un y tur”,Sra. Ronella TjinAsjoe-Croes a expresa na final di e conferencia di prensa di Gobierno di Aruba.